Ўзбекистонда эксклюзив ҳуқуққа эга компаниялар реестри эълон қилинди

Рақобат қўмитаси эксклюзив ҳуқуқларга эга хўжалик юритувчи субъектлар реестрини эълон қилди.

Реестрга 81 та фаолият тури бўйича эксклюзив ҳуқуққа эга 67 та компания киритилган.

Ёпиқ ҳужжатлар асосида берилган эксклюзиқ ҳуқуқлар эгалари алоҳида реестрда юритилиши маълум қилинган.

Очиқ реестрга кирган корхоналарнинг аксарияти давлатники бўлиб, уларнинг катта қисми – қурилиш соҳасига тўғри келади. Шунингдек, ахборот технологиялари соҳасидаги бир нечта корхоналарга у ёки бу йўналишда эксклюзив ҳуқуқлар берилган.

Реестрда қишлоқ хўжалиги, геология, фармацевтика, туризм, суғурта ва нашриёт фаолияти билан шуғулланувчи бир нечта корхоналарни кўриш мумкин.

Энергетика соҳасидан, гидроэнергетика тармоғидаги айрим ташкилотлар, шунингдек, “Ўзэнергосотиш” (электр энергиясини марказлашган тартибда харид қилиш ва сотиш), UzGasTrade (табиий газни марказлашган тартибда харид қилиш ва сотиш) ҳамда Миллий диспетчерлик марказини рўйхатда кўриш мумкин.

Реестрдаги кам сонли хусусий ширкатлар қаторидан “CRPT Turon” МЧЖ жой олган. Бу корхона иккита эксклюзив ҳуқуққа эга: (1) “Асл белгиси” маҳсулотларни маркировкалаш ва кузатиб бориш миллий ахборот тизимига операторлик қилиш ҳамда (2) мажбурий маркировкаланадиган маҳсулотларни ишлаб чиқарувчилар ва импорт қилувчиларга маркировка кодларини тақдим этиш шулар жумласидан.

Сўнгги вақтларда Пискент автополигони сабаб тез-тез жамоатчилик эътиборига тушаётган Ўзбекистон илмий-синов ва сифат назорати маркази (UzTest) “давлат назорати билан боғлиқ синовларни амалга ошириш” бўйича алоҳида ҳуқуққа эга.

Айни пайтда, мобил қурилмаларнинг IMEI кодларини мажбурий рўйхатдан ўтказиш тизимининг оператори – Information Technology Center (АҚШ) реестрга киритилмаган.

Шунингдек, фойдали қазилмаларга кириш ва уларнинг экспорти бўйича эксклюзив ҳуқуққа эгалиги айтиладиган компаниялар ҳам очиқ реестрдан жой олмаган.

“Эксклюзив ҳуқуқлар хўжалик юритувчи субектларга фойдаланилиши, тарқатилиши ва тақдим этилиши қонун билан чекланган норматив-ҳуқуқий ҳужжатлар билан берилганлиги аниқланган тақдирда, уларнинг реестри белгиланган тартибда алоҳида юритилади”, – дейилади очиқ реестр сўнгида тақдим этилган изоҳда.