Кремл Россия ва АҚШ музокараларидан «дарҳол натижалар» кутмасликка чақирди

Россия президентининг матбуот котиби Дмитрий Песков Россия—Америка муносабатлари динамикасини яхши деб атади, бироқ РФ ва АҚШ музокараларидан «дарҳол натижалар» кутмасликка чақирди.

«Аслида, барчаси жуда яхши кетмоқда», — деди Песков «Россия» телеканали журналисти Павел Зарубинга.

Песковнинг сўзларига кўра, «муносабатларни нолдан бошлаб қайта жонлантириш — жуда қийин иш» ва «жуда кескин ва ўзига хос саъй-ҳаракатларни» талаб қилади. «Бутун йўл ҳеч бўлмаганда минимал ўзаро ишонч муҳитини тиклаш, бу ишончни мустаҳкамлаш учун кичик қадамлардан иборат», — дея таъкидлайди у. Шунингдек, Песков ҳозирда дипломатлар, махсус хизматлар, ҳар икки мамлакат президентларининг махсус вакиллари шу иш билан шуғулланаётганини қўшимча қилди.

«Буларнинг барчаси ёрдам беради, аммо дарҳол натижалар пайдо бўлишини кутмаслик керак. Муаммолар ҳаддан ташқари мураккаб ва улар жуда кечиктириб юборилган», — дейди Песков.

АҚШ феврал ўрталарида урушни тўхтатиш бўйича Россия ва Украина билан алоҳида-алоҳида музокаралар бошлаган. Шундан буён Вашингтон фақат энергетика объектларига 30 кун давомида зарба бермаслик бўйича келишувга эришди холос. Шу билан бирга, Киев ва Москва мунтазам равишда бир-бирини ушбу битимни бузишда айблаб келмоқда. Украина, шунингдек, АҚШнинг 30 кунга тўлиқ тинчлик сулҳини тузиш таклифига рози бўлди, аммо Россия буни рад этди.

АҚШ президенти Доналд Трамп Россияни бир неча бор Украинадаги урушни якунлаш бўйича «ҳаракат қилишга» чақирди. Axios манбаларининг маълум қилишича, агар апрел охирига қадар тинчлик сулҳи борасида келишувга эришилмаса, Трамп РФга янги санкцияларни жорий этиши мумкин.