Хоминаий: Эрон қўшинлари жанговар шай ҳолатда

Эрон олий раҳбари оятуллоҳ Али Хоминаий Қўшма Штатлар томонидан ҳужум бўйича хавотирлар фонида мамлакат қуролли кучларини жанговар шай ҳолатга келтирди, дея маълум қилди Reuters агентлигига эронлик юқори лавозимли амалдор 6 апрел, якшанба куни.

Агентлик манбасига кўра, Эрон қўшни давлатлар – Ироқ, Кувайт, Қатар, БАА, Туркия ва Баҳрайнга мактуб йўллаб, АҚШнинг ҳужумини ҳар қандай қўллаб-қувватлаш, жумладан, АҚШ ҳарбий кучларига ҳаво ҳудудини бўшатиб бериш Теҳронга нисбатан душманлик ҳаракати сифатида баҳоланиши ва «жиддий оқибатларга олиб келиши» ҳақида огоҳлантирган.

Шу билан бирга, аввалроқ АҚШ президенти Доналд Трампнинг тўғридан тўғри музокаралар ўтказиш ҳақидаги талабини рад этган Хоманаий рақиб давлатлар ўртасидаги узоқ йиллик алоқа канали бўлган Уммон орқали билвосита музокараларни давом эттирмоқчи, деди Reuters агентлигига эронлик расмий. Бундай музокаралар яқин келажакда бошланиши мумкин, агар Қўшма Штатлар уларни қўллаб-қувватласа, дея қўшимча қилди у.

«Биз Эронга қарши қаттиқ санкцияларни бекор қилиш эвазига ишончни мустаҳкамлаш мантиғига асосланиб, ядровий дастуримиз ва санкцияларни бекор қилиш бўйича музокараларни қайта бошлашга тайёрмиз», деди мамлакат ташқи ишлар вазири Аббос Арақчи ва Эрон «миллий манфаатлари ва суверенитетини ҳимоя қилишда қатъий» эканини қўшимча қилди. Эрон президенти Масъуд Пизишкиён аввалроқ Теҳрон «тенг шартларда, таҳдидларсиз суҳбат ўтказилишини» исташини айтган эди.