Венгрия Халқаро жиноий суддан чиқишини эълон қилди

Венгрия Халқаро жиноий суд (ХЖС) юрисдикциясидан чиқиш жараёнини бошлади. Бу ҳақда мамлакат бош вазири девони раҳбари Гергей Гуйяш маълум қилди.

«Пайшанба куни ҳукумат конституциявий ва халқаро ҳуқуқ меъёрларига мувофиқ Халқаро жиноий суддан чиқиш бўйича иш бошлайди», деб ёзди у ижтимоий тармоқда.

Венгрия расмийларининг ХЖС таркибидан чиқиши ҳақидаги баёноти Исроил бош вазири Бинямин Нетаняҳу ташрифи фонида янгради. Аввалроқ, ХЖС уни ҳибсга олиш ҳақида халқаро ордер берган эди.

Венгрия бош вазири Виктор Орбан ХЖС Исроил бош вазирини ҳибсга олишга ордер бериш ҳақидаги қарорининг эртасига Нетаняҳуни мамлакатга таклиф қилган. Шу билан бирга, Орбан Нетаняҳу ҳибсга олинмаслигига ваъда берди ва ХЖС қарорини «қўпол, беадаб ва мутлақо қабул қилиб бўлмайдиган» деб атади.

Венгрия 1999 йилда Рим статутини, ХЖС ташкил этиш ҳақидаги халқаро шартномани имзолади ва икки йилдан сўнг уни ратификация қилди.

Венгриянинг ХЖС таркибидан чиқиш жараёни бир йил давом этади.

2023 йил март ойида Венгрия ҳукумати агар Россия президенти Владимир Путин мамлакатга келса, ХЖС ордерига кўра ҳибсга олинмаслигини айтган. Гуйяш Венгрияда бунинг учун ҳеч қандай қонуний асос йўқлигини таъкидлаган эди, гарчи мамлакат Рим статутини имзолаган ва ратификация қилган бўлса-да.