2025–2026 йилларда 3 мингга яқин микро ГЭС қурилиши белгиланди

Янги микро гидроэлектр станцияларини ишга тушириш ҳисобига 280 минг аҳолини электр энергияси билан таъминлаш режа қилинган.

Фото: Ўзбекгидроэнерго

«Республика ҳудудларида микро гидроэлектр станциялари тармоғини ривожлантириш бўйича қўшимча чора-тадбирлар тўғрисида»ги президент қарори қабул қилинди.

Қарорга кўра, 2025–2026 йилларда Республика ҳудудларида микро гидроэлектр станциялари тармоғини ривожлантиришнинг асосий мақсадли кўрсаткичлари этиб қуйидагилар белгиланди, жумладан:

- жами қуввати 164 МВт бўлган 2 983 та микро ГЭС қуриш ва йилига 500 млн кВт/соат экологик тоза электр энергиясини ишлаб чиқариш;

- янги микро ГЭС ишга тушириш ҳисобига 280 мингта аҳолини электр энергияси билан таъминлаш;

- қурилиш даврида 1200 нафар ишчининг бандлигини таъминлаш ва лойиҳалар ишга тушгандан кейин 520 та доимий иш ўрни яратиш.

2025 йил 1 майгача лойиҳа ҳужжатларига асосан микро ГЭС қуриш учун танлаб олинган ер участкалари белгиланган тартибда Энергетика вазирлигига ажратилади.

Энергетика вазирлиги ажратилган ер участкалари лойиҳа ташаббускорларига микро ГЭС қуриш ва ишга тушириш учун 20 йил муддатга ижарага берилишини таъминлайди.

Бундан ташқари, кичик ва микро гидроэлектр станциялари лойиҳаларини амалга ошириш гуруҳи ташкил этилади.

#Энергетика #микро ГЭС