Танзила Норбоева Парламентлараро иттифоқ бош котиби билан учрашув ўтказди

2 апрел куни Олий Мажлис Сенати раиси Танзила Норбоева Парламентлараро иттифоқ бош котиби Мартин Чунгонг билан учрашув ўтказди. Бу ҳақда парламент юқори палатаси матбуот хизмати хабар берди.

Қайд этилишича, учрашувда Ўзбекистонда ўтказиладиган Парламентлараро иттифоқнинг юбилей 150-ассамблеясига тайёргарлик кўришга оид асосий масалалар ҳамда парламент ислоҳотлари соҳасидаги ҳамкорликни янада ривожлантириш муҳокама қилинган.

Шунингдек, ассамблеянинг Ўзбекистонда амалга оширилаётган ислоҳотларга тўлиқ мос келадиган «Ижтимоий ривожланиш ва адолат учун парламент ҳаракати» мавзусининг тарихий аҳамиятига алоҳида эътибор қаратилган. Ўзбекистон парламенти фаолиятининг ижобий жиҳатлари бошқа мамлакатлар учун намуна бўлиши мумкинлиги таъкидланган.

«Мартин Чунгонг Ўзбекистон парламентининг Парламентлараро иттифоқ билан самарали ҳамкорлиги учун миннатдорлик билдириб, мамлакатнинг Парламентлараро иттифоқ фаолиятига қўшаётган салмоқли ҳиссасини қайд этди», — дейилади хабарда.

Учрашув якунида томонлар Тошкентда ўтказиладиган Парламентлараро иттифоқнинг юбилей ассамблеяси халқаро парламентаризм тарихида муҳим воқеа бўлишига ва глобал муаммоларни ҳал қилишда парламентларнинг ролини кучайтиришига ишонч билдирди.