“Сенатор сўров юбормагунча пул олиб юрилган” — Танзила Норбоева импорт автоларга экосертификат ҳақида

Ўзбекистон божхоначилари май ойи бошида импорт гибрид автомобиллардан камида Евро-4 экологик тоифасига мослигини тасдиқловчи экологик сертификат талаб қила бошлаган эди. 3 май куни Олий Мажлис Сенати баёнот бериб, бу масалада экология вазирига сенатор сўрови юборилганини маълум қилганди.

Сенатнинг бугун, 28 май кунги ялпи мажлисида шу масала муҳокама қилинди.

Сўров муаллифи, Сенатнинг экологияга масъул қўмитаси раиси Анвар Тўйчиевнинг айтишича, Экология вазирлигининг жавобида айрим маълумотлар тушиб қолган, айримлари очиқланмаган. Шу сабабли сенаторлар жамоатчилик саволларига аниқ жавоб беролмаган.

Тўйчиев мажлисда иштирок этаётган Экология вазирлиги ва Божхона қўмитаси масъулларидан айрим жиҳатларга аниқлик киритиб беришни сўради.

«Ҳозирги кунда мамлакатимизга олиб кирилаётган M ва N тоифадаги электр двигатели билан жиҳозланган гибрид автомобилларни божхона органларида расмийлаштириш қандай? Сертификат талаб қилиняптими ёки қилинмаяптими?» – дея савол берди сенатор.

Экология вазирининг биринчи ўринбосари Обиджон Қудратовга кўра, амалдаги низомга муофиқ, фақатгина газ, бензин ва дизел ёқилғисида ҳаракатланувчи двигателга эга, М ва N тоифадаги автомобиллар экологик сертификатланади.

«Бугунги кунда электродвигателли транспорт воситаларини экологик сертификатлаш талаб этилмаслиги белгилаб қўйилган. Гибрид автомобиллар учун истисно ҳолатлар белгиланмаган. Бу бўйича Вазирлар Маҳкамаси қарори лойиҳаси ишлаб чиқилиб, вазирлик ва идоралар билан келишилди», – деди Қудратов.

Вазир ўринбосарининг қўшимча қилишича, айни пайтда гибрид автомобиллардан экологик сертификат талаб қилинмаяпти.

Сенат раиси Танзила Норбоева одамлардан тўлов ундирилгани қанчалик тўғри ёки нотўғрилигини сўради.

«Сертификатлаш бугунги кунда умуман талаб этилмаяпти. Бу масалада кўтарилган вақтда аниқлик киритиб, тегишли кўрсатмалар бердик. Божхона қўмитаси билан келишиб олинди. Тўлов ундирилмаслиги керак», – дея жавоб берди экология вазири ўринбосари Обиджон Қудратов.

Кўтарилган масалага Божхона қўмитаси раисининг биринчи ўринбосари Ғайрат Носиров ҳам изоҳ бериб, бугунги кунда гибрид автомобиллар учун экологик сертификат талаб этилмаётганини у ҳам тасдиқлади. Шу аснода қуйидагича қисқа диалог кузатилди:

Ғ.Носиров: Танзила Камаловна, бугунги кунда гибрид автомобилларга божхона органлари томонидан экология сертификати умуман талаб қилинмаяпти.

Т.Норбоева: Талаб қилинмаяпти?

Ғ.Носиров: Талаб қилинмаяпти.

Т.Норбоева: Лекин сенатор сўров юбормагунча пул олиб юрилган-да.

Ғ.Носиров: У пул Экология қўмитасига кетади, бизга келмайди, Танзила Камаловна. Лекин бунга аниқлик киритиб оламиз.

Бунга жавобан Сенат раиси “Норматив-ҳуқуқий ҳужжатлар тўғрисида”ги қонуннинг 18-моддасини эслатди. Бу моддага кўра, инсон билан давлат органларининг ўзаро муносабатларида юзага келадиган қонунчиликдаги барча зиддиятлар ва ноаниқликлар инсон фойдасига талқин этилиши керак.

“Божхона билан Экология яхшилаб қонуннинг мана шу нормаси ичига кириб, одамлардан келаётган норозиликларни шу нуқтайи назардан кўриб чиқишинглар керак”, деди Норбоева.

Аввалроқ Autodeklarant канали экологик сертификат учун талаб қилинаётган тўлов миқдори 2 млн сўмдан ошиқ эканини ёзганди.