Жамият | 19:51 / 02.04.2025
14290
4 дақиқада ўқилади

Чирчиқда жанжал оқибатида бир киши вафот этди

Чирчиқда 5 март куни икки шахс ўртасида жанжал келиб чиққан, улардан бири иккинчисига оғир жароҳат етказган. Кейинроқ жабрланувчи шифохонада вафот этган. Ҳуқуқ-тартибот идораларига кўра, жанжал маиший сабабларга кўра келиб чиққан, жабрланувчининг онаси эса ўғли калтакланган аёлни ҳимоя қилганини даъво қилмоқда.

Фото: Тошкент вилояти ИИББ

Тошкент вилояти Чирчиқ шаҳрида икки киши жанжали оқибатида улардан бири шифохонада вафот этди. Тошкент вилояти ИИББ бу ҳолат юзасидан маълумот берди.

Унга кўра, 5 март куни Чирчиқ шаҳрида 37 ёшли Ҳамид Дустов ва унинг таниши, 31 ёшли Мурат Кудабаев ўртасида жанжал чиққан. Хабарда жанжал спиртли ичимлик олди-сотдиси устида юзага келгани, Ҳамид Муратга оғир тан жароҳатлари етказгани, жабрланувчи тан жароҳатлари оқибатида кейинчалик шифохонада вафот этгани айтилади.

«Газета.uz» аниқлаган тафсилотга кўра, Дустов ўша куни тахминан соат 19:00 да ўзига тегишли спиртли ичимликлар дўконини ёпиб, уйига қайтаётганида ўз таниши Муратни учратган. Мурат ундан дўконни очиш ва унга алкогол сотишни сўраган, аммо рад жавобини олган. Шундан сўнг уларнинг баҳслашуви муштлашувга айланиб кетган.

Жанжал давомида Дустов рақибининг боши ва юзига бир неча марта қўл ва оёқлари билан зарба берган. Жабрланувчи Чирчиқ шаҳар тиббиёт бирлашмасига олиб борилиб, унга очиқ бош мия жароҳати, бош мия лат ейиши, чап чакка-тепа суяги синиши, ўнг қош ва чап чакка-тепа соҳаси йиртилган жароҳатлари, травматик шок ташхиси қўйилган.

Кўрсатилган тиббий ёрдамга қарамай, Марат Кудабаев 6 март куни жонлантириш бўлимида вафот этган. Унинг бир фарзанди етим қолган.

Ижтимоий тармоқларда Маратнинг онаси Еленанинг мурожаати тарқалди. Аёл ўғли Марат Ҳамиднинг ҳужумига учраган аёлни ҳимоя қилишга уринганида калтаклангани ҳақида айтади.

Унинг сўзларига кўра, Маратнинг бош мияси жароҳатланиши ва бош суяги синишидан ташқари, бурун суяклари синиб, суяк бўлаклари силжиган, шунингдек, унинг иккита қовурғаси синган, кейинчалик ўпкаси тешилган.

«Ҳамид ўша куни аёлни калтаклаган (у тирик, аммо даволаниш кўринишидаги асоратлар қолган). Мурат бу аёлни ҳимоя қилган», – деб ёзади она ва муштумзўр жавобгарликдан қочиб қутулмаслиги учун ушбу воқеани кенг жамоатчиликка тарқатишни сўраган. «Чунки ҳуқуқ-тартибот идоралари унинг ҳаракатларини оддий кўча муштлашуви деб баҳоламоқда», дея қўшимча қилган у.

Ҳолат юзасидан Жиноят кодексининг 104-моддаси 3-қисми «д» банди (жабрланувчининг ўлишига сабаб бўлган қасддан баданга оғир шикаст етказиш) билан жиноят иши қўзғатилган.

7 март куни фуқаро Д.Х.га нисбатан айб эълон қилиниб, «қамоққа олиш» тарзидаги эҳтиёт чораси қўлланган.

Ҳамид Дустов / ижтимоий тармоқлар

Ҳуқуқ-тартибот идоралари маълумотларига кўра, Ҳамид Дустов муқаддам судланган, 2011 йилда у талончиликда айбдор деб топилган. Марат Кудабоев ҳам 2023 йилда ўғрилик учун судланган, бироқ иш томонларнинг ярашуви муносабати билан тугатилган.

Тошкент вилояти ИИББ матбуот хизмати мазкур ҳолат бўйича тергов кетаётгани боис ижтимоий тармоқ фаолларидан асосланмаган хабарларни тарқатмасликни сўради.

«Ҳозирда ОАВ ва жамоатчилик томонидан ҳолат юзасидан турли, ҳаққонийлиги текширилмаган талқинлар эълон қилинмоқда», – дейилади хабарда.

Идора Жиноят кодексининг 239-моддасига кўра, суриштирув ёки дастлабки тергов маълумотларини суриштирувчи, терговчи ёки прокурорнинг рухсатисиз ошкор қилиш жиноий жавобгарликка сабаб бўлишидан огоҳлантирган.

«Ҳозирда мазкур жиноят иши юзасидан тергов жараёни кетаётганини инобатга олиб, ижтимоий тармоқ фаолларидан воқеа тафсилотларини бир томонлама тавсиф қилмасликни ва асослантирилмаган ахборот тарқатмасликларини сўраймиз», – дея қайд этилади хабарда.

Мавзуга оид