Швейцария элчиси ишга таклиф билан боғлиқ фирибгарликлар ҳақида огоҳлантирди

“Фирибгарлар ўзларини компания вакили сифатида кўрсатиб, ҳатто Швейцария расмийлари номидан сохта ҳужжатлар ясайди”, деди Швейцариянинг Ўзбекистондаги элчиси Константин Оболенский. У одамларни ҳар қандай ҳолатда ҳам тўлов қилмасликка чақириб, иш таклифи ҳақиқий бўлса, ишлаш учун рухсатнома олиш иш берувчининг зиммасида бўлишини эслатди.

Фото: Швейцариянинг Ўзбекистондаги элчихонаси

Шу кунларда Швейцариянинг Ўзбекистондаги элчихонасига бу давлатга сохта ишга таклиф қилиш ва қалбаки ишлаш рухсатномалари билан боғлиқ мурожаатлар кўпайган.

Элчихона ва Ўзбекистон Миграция агентлиги ўзбекистонликларни огоҳ бўлишга чақирди.

Швейцариянинг Ўзбекистондаги фавқулодда ва мухтор элчиси Константин Оболенский ўз мурожаатида шундай дейди:

“Хонимлар ва жаноблар, биз Швейцариянинг Тошкентдаги элчихонасида фирибгарликлар, жумладан, Швейцарияга ёлғон иш таклифлари ва “у ерда ишлашга” деб берилаётган сохта ишлаш рухсатномалари ҳақида тез-тез эшитаяпмиз. Шундай экан, Ўзбекистонда яшаб, Швейцарияда иш қидираётган бўлсангиз, фирибгарлик қурбони бўлиб қолишдан ўзингизни ҳимоя қилинг.

Агар сизга иш таклифи келиб тушса, жуда эҳтиёт бўлинг ва унинг чиндан ҳам ҳақиқийлигини текширинг. Иш таклифининг ҳақиқийлигини текшириш учун Швейцариядаги потенциал иш берувчи билан бевосита алоқада эканингизга ишонч ҳосил қилинг.

Эътибор беринг, фирибгарлар ўзларини компания вакили сифатида кўрсатишади ва компания ёки ҳатто, Швейцария расмийлари номидан сохта ҳужжатлар ясайди. Шунинг учун, Швейцарияда ишга олмоқчи бўлган компания билан тўғридан тўғри мулоқот қилаётганингизни турли манбалардан фойдаланиб текширинг.

Жуда муҳим: ҳеч қандай шароитда пул тўламанг ёки ўтказманг! Агар иш таклифи ҳақиқий бўлса, ишлаш учун рухсатнома олиш иш берувчининг зиммасида бўлади. Иш визасини олиш учун Швейцариянинг Москвадаги элчихонасида жойлашган Минтақавий консуллик марказига шахсан ариза топширишингиз керак бўлади. Тошкентдаги элчихонага эмас!

Агар сиз ўзингизни бундай жиноят қурбони ёки фирибгарлар билан алоқада бўлдим, деб ҳисобласангиз, бу ҳақда маҳаллий ички ишлар органига хабар беришингизни тавсия қиламиз”.

Миграция агентлигига кўра, хорижда қонуний ва хавфсиз ишлашни мақсад қилганлар агентлик ва унинг ҳудудий филиалларига ёки лицензияга эга хусусий бандлик агентликларига мурожаат қилиши мумкин.

Лицензияга эга хусусий бандлик агентликлари рўйхати ушбу расмий манбада келтирилган.

#Швейцария #фирибгарлик #Константин Оболенский