Тошкентда автобус ҳайдовчиларининг маоши оширилди

“Тошшаҳартрансхизмат” тизимидаги автобус ҳайдовчиларининг ойлик маоши 5-6 млн сўмга етказилди. Компания хабарига кўра, ҳайдовчиларнинг маоши президент топшириғига асосан “2 баробар оширилган”.

“Тошшаҳартрансхизмат”нинг автобус ҳайдовчилари маоши 2 баробарга оширилди, дея маълум қилинди компаниянинг Telegram-каналида.

Расмий хабарга кўра, шу йил декабр ойидан бошлаб ҳайдовчилар камида 5-6 млн сўм ойлик маош олади. Бу борада президент Шавкат Мирзиёев топшириқ берган.

Давлат раҳбари кеча, 14 декабр куни 18-автобус саройига бориб, соҳадаги камчиликларни санаган ва масъулларга кўрсатмалар берганди. Хусусан, март ойига қадар пойтахтга мингта янги автобус олиб келиниши керак.

“Тошшаҳартрансхизмат” хабарида қўшимча қилишича, жамоат транспорти ҳайдовчиси бўлиб ишлашни истовчилар (71) 233-03-23 ва (93) 505-03-23 телефонларига қўнғироқ қилиши мумкин.

#Тошкент #жамоат транспорти #маош