Sudan armiya kimyoviy qurol qo‘llangani haqidagi da’volarni tekshirmoqda

Sudan suvereniteti kengashi raisi Abdulfettoh al-Burhon AQShning Sudan armiyasi Tezkor harakat kuchlariga qarshi harbiy amaliyotlar chog‘ida «kimyoviy qurol qo‘llagani» haqidagi iddaolarini tekshirish uchun maxsus komissiya tuzishga qaror qildi.

Sudan Tashqi ishlar vazirligi bayonotiga ko‘ra, Suverenitet kengashi rahbari Burhon tashqi ishlar va mudofaa vazirliklari hamda Bosh razvedka xizmati vakillaridan iborat maxsus komissiya tuzishga qaror qilgan.

«Ushbu qaror Sudanning xalqaro majburiyatlariga, xususan, Kimyoviy qurollar bo‘yicha shartnomaga sodiqligiga hamda Sudan hukumati tomonidan qabul qilingan oshkoralik tamoyiliga muvofiq qabul qilindi, bu esa AQSh ma’muriyatining Sudan kimyoviy qurol qo‘llagani haqidagi ayblovlarini rad etadi», deyiladi bayonotda.

22 may kuni AQSh Davlat departamenti o‘tgan yili Tezkor harakat kuchlari bilan to‘qnashuvlar chog‘ida Sudan armiyasining «kimyoviy qurol qo‘llagani» sababli Sudanga qarshi sanksiyalar qo‘llash qarorini e’lon qildi.

AQSh Kongressi Davlat departamentining sanksiyalar 6 iyundan kuchga kirishi haqidagi qaroridan xabardor qilingan.

Sanksiyalar Sudan eksportiga cheklovlar va AQSh hukumati kreditlariga kirishdagi to‘siqlarni o‘z ichiga oladi.

23 may kuni Sudan hukumati AQShning armiya mamlakatda davom etayotgan mojaroda kimyoviy qurol qo‘llagani haqidagi «asossiz» va «yolg‘on» ayblovlarini qat’iyan rad etishini bildirdi.

Sudan hukumati ham AQSh qarorini keskin qoralab, uni «siyosiy shantaj» deb atadi.