Rossiya memorandumni imzolash uchun Zelenskiyni chetlatishni talab qilmoqda

Ukrainada o‘t ochishni to‘xtatish bo‘yicha memorandumni imzolash uchun bu mamlakat xalqi yangi prezidentni saylashi kerak, deya ma’lum qildi Rossiya Tashqi ishlar vazirligi. Ukraina prezidenti Volodimir Zelenskiy qonuniyligini yo‘qotdi va shu sababli xalqaro hujjatlarni imzolay olmaydi, dedi Rossiya TIV yuridik departamenti direktori Maksim Musixin 22 may, payshanba kuni TASS agentligiga bergan intervyusida.

Memorandum «xalq mandatiga ega bo‘lgan shaxs» tomonidan imzolanishi kerak, chunki «aks holda muammolar bo‘ladi», dedi u. Musixin shuningdek, Oliy rada spikeri xalqaro hujjatlarni imzolash vakolatiga ham ega bo‘lishi mumkinligini aytdi.

Rossiya prezidenti Vladimir Putin qo‘shni davlatda yangi prezidentlik saylovlari o‘tkazilishini bir necha bor talab qilgan. Mart oyi oxirida u Ukrainada saylovlar o‘tkazish uchun BMT va bir qator davlatlar shafeligida «vaqtinchalik boshqaruv»ni joriy etishni muhokama qilishni, keyin esa «butun dunyoda tan olinadigan va ishonchli bo‘ladigan qonuniy hujjatlar»ni imzolashni taklif qildi.

Avvalroq Putin Zelenskiyni «sobiq davlat rahbari» deb atagan va Zelenskiy bilan tinchlik shartnomasini tuzishdan bosh tortishini ma’lum qilgan, chunki u «noqonuniyligi tufayli hech narsani imzolashga haqli emas». Bu pozitsiya, jumladan, Ukraina Tashqi ishlar vazirligi rahbari Andrey Sibiga tomonidan tanqid qilindi: «Ukraina prezidentining qonuniyligi haqidagi izohlar bema’nilik. Kremlda chorak asrlik boshqaruv davomida Ukrainada uchta prezident adolatli saylovlar sharoitida o‘zgardi».