Toshkentda kanalga tushib ketgan qizni qutqargan erkak halok bo‘ldi

Toshkentning Bo‘rijar kanaliga tushib ketgan qizni qutqargan erkakning o‘zi halok bo‘ldi. Bosh prokuratura matbuot kotibi Hayot Shamsutdinov holat yuzasidan tergovga qadar tekshirish harakatlari olib borilayotganini ma’lum qildi.

«Ushbu voqeada jasorat ko‘rsatgan marhumning yaqinlariga chuqur ta’ziya izhor etib, hamdardlik bildiramiz», deb yozdi Shamsutdinov.

Hodisa 5 may kuni kechqurun sodir bo‘lgan. Yakkasaroy tumanidagi «Rakat» mahallasida yashovchi 8-9 yoshli uch nafar qiz qirg‘oqqa tushgan. Ulardan biri sirpanib, suvga tushib ketgan. Oqim qizni kanal markaziga oqizgan. Dugonasiga yordam bermoqchi bo‘lgan boshqa qiz ham suvga sakragan. Oqim uni ham oqizib ketgan. Shundan so‘ng bolalar yordamga chaqirgan.

Qizlardan birini yaqin atrofda yashovchi ayol xoda yordamida qutqarib olgan. Quyi oqimdagi ikkinchi qizni 43 yoshli erkak A.S. qutqargan, biroq o‘zi qirg‘oqqa chiqolmay qolgan. Uning jasadi 4 km masofadan topilgan.

Baxtsiz hodisaga sayr zonasida xavfsizlik talablariga rioya etilmagani – suvga tushadigan yo‘llarning yopilmagani va betonlangan kanaldan chiqish imkoni bo‘lmagani sabab sifatida keltirilmoqda