Pxenyan yangi turdagi zenit-raketa tizimini sinovdan o‘tkazdi

KXDR yangi zenit-raketa tizimini muvaffaqiyatli sinovdan o‘tkazdi. Koreya Markaziy telegraf agentligining ma’lum qilishicha, sinovda mamlakat rahbari Kim Chen In ham ishtirok etgan.

«KXDRning Raketasozlik bosh boshqarmasi 20 mart kuni eng yangi zenit-raketa tizimining kompleks jangovar xususiyatlarini tekshirish uchun sinov uchirishini o‘tkazdi», — deyiladi xabarda.

Ta’kidlanishicha, tegishli mudofaa sanoati korxonasi tomonidan ushbu tizimni seriyali ishlab chiqarish boshlangan.

Agentlikning qayd etishicha, sinov jarayoni tizimning «tezkor jangovar reaktivligi ustunligi» hamda uning ishonchliligini tasdiqlagan.

Sinovlarni KXDR yetakchisi Kim Chen In bevosita kuzatib borgan. U Shimoliy Koreya armiyasi «ajobiy jangovar xususiyatlarga ega navbatdagi muhim mudofaa quroli bilan ta’minlanishini» ma’lum qilib, ixtirochilarga minnatdorchilik bildirgan.

Eslatib o‘tamiz, yanvar oxirlarida Kim Chen In KXDR yadroviy qalqonini mustahkamlashni buyurgandi. Uning aytishicha, yadroviy materiallar ishlab chiqarish rejasini yanada oshirish va «mamlakatning yadroviy qalqonini mustahkamlashda novatorlik natijalariga erishish» kerak.