Avto Climate Control компанияси 230 млрд сўмга хусусийлаштирилди

“Avto Climate Control” МЧЖ устав капиталидаги давлат улуши хусусийлаштирилди, дея хабар берди Давлат активларини бошқариш агентлиги матбуот хизмати.

Давактивга кўра, Avto Climate Control'даги давлат улушини сотиб олишга 4 та компания қизиқиш билдирган, улардан 3 таси мажбуриятга эга таклифлар йўллаган. Хусусийлаштириш жараёнига консултант сифатида Portfolio Investments жалб этилган.

Якунда 230 млрд сўм миқдоридаги энг юқори харид баҳосини таклиф қилган “Best Pipe and Parts” АЖ савдо ғолиби деб топилган.

Харидор сотиб олиш тўловининг дастлабки 35 фоизини 1 ой давомида амалга оширади. Шу билан бирга, активнинг асосий фаолият турини 10 йилдан кам бўлмаган муддат давомида сақлаб қолиш, маҳсулотларнинг лицензиати бўлган General Motors компанияси (АҚШ) билан лицензия келишувларига қатъий риоя қилиш шартларини ҳам қабул қилган.

“Best Pipe and Parts” АЖ ҳақида

Харидор – “Best Pipe and Parts” АЖ 1996 йилнинг июл ойида рўйхатга олинган. Фаолият тури – автотранспорт воситалари учун бошқа бутловчи қисмлар ва аксессуарлар ишлаб чиқариш. Устав фонди – 297 млн сўм.

Компаниянинг акциядорлари қуйидагилар:

• UzAuto Korea – 42,3 фоиз;
• UzAutoComponents – 24,44 фоиз;
• Dongwon Metal – 24 фоиз;
• Салима Тошқўзиева – 9,26 фоиз.

Best Pipe and Parts 2025 йил феврал ойида “Avtokomponent” МЧЖнинг 98,8 фоиз улушини 105 млрд сўмга сотиб олганди.