Трамп Россияга Украина билан келишувга эришиш учун 50 кун муҳлат бермоқчи

Оқ уй раҳбари акс ҳолда «жуда катта тарифлар» жорий этиш билан таҳдид қилди.

Фото: AP

АҚШ президенти Доналд Трамп агар 50 кун ичида Украина бўйича келишувга эришилмаса, «жуда катта тарифлар» жорий этиш ниятида эканини айтди.

Оқ уйда НАТО бош котиби Марк Рютте билан бўлган учрашувда Трамп «Россиядан жуда норози» эканини таъкидлади.

Доналд Трамп агар Украина бўйича 50 кун ичида келишувга эришилмаса, АҚШ Россия ва унинг савдо ҳамкорларига 100 фоиз миқдорида иккиламчи санкциялар жорий этишини таъкидлади. 50 кунлик муҳлат 1 сентябр куни тугайди.

Шунингдек, Трамп Европа давлатлари Украинага қурол етказиб бериш учун тўловни НАТО орқали амалга оширишини айтди.

«Бугун биз шартнома туздик, унга кўра қурол етказиб берамиз ва улар (Европа) пулини тўлайди. АҚШ (Украинадан) ҳеч қандай пул олмайди. Биз қурол сотиб олмаймиз, лекин уни ишлаб чиқарамиз ва улар бунинг учун пул тўлайди», деди АҚШ президенти ва НАТО Америка қуролларини етказиб беришни мувофиқлаштиришини қўшимча қилди.

НАТО Бош котиби Марк Рютте АҚШ етакчиси баёнотини «Украина учун ажойиб янгилик» деб атади.

«Агар мен Владимир Путиннинг ўрнида бўлганимда ва яқин 50 кун ичида нима режалаштирилаётганини эшитганимда, Украина билан музокаралар столига ўтириш кераклиги ҳақида ўйлаган бўлардим», деди Рютте.

Аввалроқ, АҚШ сенатори Линдси Грэм президент Доналд Трамп Россияга ва унга Украинадаги урушда ёрдам бераётган давлатларга нисбатан мисли кўрилмаган санкцияларни тайёрлаётганини айтган эди.

#АҚШ #Россия #Доналд Трамп