Қўшимча функционаллар
-
Тунги кўриниш
Кличко Германия канцлерини Украинага TAURUS ракеталарини беришга чақирди
Bild am Sonntag газетаси учун мақоласида Киев мэри Кличко Фридрих Мерцга Украинага узоқ масофага учувчи қуроллар етказиб бериш ҳақидаги баёнотларини эслатди. Путин тинчликка интилмаяпти, дея қўшимча қилди у.
Фото: Bernhard Huber / MBDA
Киев мэри Виталий Кличко Германиядан Россия Федерациясининг Украинага қарши кенг кўламли ҳарбий тажовузига қарши мудофаа учун кейинги ҳарбий ёрдамга умид қилмоқда. 6 июл, якшанба куни Bild am Sonntag газетасида чоп этилган мақоласида у Германия канцлери Фридрих Мерцни Украинани TAURUS қанотли ракеталари билан таъминлашга чақирди.
«Канцлер Фридрих Мерц бундан аввал жуда тўғри таъкидлаган эдики, Россиянинг тинч аҳоли объектларига тинимсиз ҳужумлари TAURUS ракеталари етказилишига олиб келиши керак. Германиянинг янги ҳукумати ўз сўзида туради, деб умид қиламиз», — деб ёзади Киев мэри Bild учун мақоласида.
Кличко Россиянинг ўз мамлакатига қарши уюштирган ҳарбий тажовузини ҳар куни кечаси тобора кескинлашиб бораётган «соф террор» деб атади. «Фақат бизнинг шаҳримизда икки мингта бино вайрон бўлди, ярадорлар ва ҳалок бўлганлар сони ортиб бормоқда», — деди у.
Киев мэрининг сўзларига кўра, Путин ўт очишни тўхтатиш, тинчлик ва урушни тугатишни истамаслигини яққол кўрсатди. «Путиннинг мақсадлари мутлақо аниқ. У қанчалик қимматга тушмасин, бутун Украинани ўз назорати остига олмоқчи. Ва агар биз уни Украинада биргаликда тўхтатмасак, у кейин бошқа мамлакатларга кириб келади», — дея ишонч билдирди Кличко.
