«Ливерпул» ҳужумчиси Жота ЙТҲ оқибатида ҳалок бўлди

Июн ойи охирида унинг никоҳ маросими бўлиб ўтганди.

«Ливерпул» ҳужумчиси, Португалия миллий жамоаси аъзоси Диогу Жота 28 ёшида оламдан ўтди, деб хабар бермоқда Marca.

Жота Испаниянинг Замора провинциясида рўй берган йўл-транспорт ҳодисаси қурбони бўлган.

Хабар қилинишича, ЙТҲ А-52 трассасининг 65-километрида, Паласиос-де-Санабрия муниципалитетида содир бўлган. Диогу ва 26 ёшли укаси, бошқа бир профессионал футболчи, Португалиянинг «Пенафиел» клуби аъзоси Андре Жота билан кетаётган Lamborghini русумли автомобил бошқарувни йўқотган ва ёниб кетган.

As нашри ёзишича, ЙТҲга қувиб ўтиш вақтида машинанинг шинаси ёрилиб кетгани, шундан кейин ҳайдовчи бошқарувни йўқотгани сабаб бўлган.

CNN маълумотига кўра, Жота яқинда ўпкасида жарроҳлик амалиёти ўтказганди ва шифокорлар унга самолётда учмай туришни тавсия қилишганди. Футболчи ЙТҲдан олдин Испания шимолий соҳилларидаги Сантандер шаҳрига кетаётган бўлган, у бу ерда паромга чиқиб, Буюк Британияга етиб олишни режалаштирганди. Жота «Ливерпул»нинг мавсумолди йиғинига қўшилиш учун Англияга қайтаётганди.

Жота ва унинг укаси қаттиқ куйиб кетганидан дарҳол таний олишмаган. Машина кимга тегишли бўлгани фақат номерларни текширишганидан кейин аниқланган.

Диогу Жота муқаддам Португалиянинг «Пасуш де Феррейра» ва «Порту», Испаниянинг «Атлетико», Англиянинг «Вулверҳэмптон» клубларида тўп сурган, 2020 йилдан буён мерсисайдликлар клуби сафида тўп суриб келаётганди.

«Қизиллар» сафида у барча турнирлар доирасида 182 ўйинда майдонга тушиб, 65 гол урган ва 26 голга узатма берган.

Жота «Ливерпул» билан икки карра Англия чемпиони (2020/21 ва 2024/2025 йиллар мавсуми), Англия Кубоги соҳиби (2021/22), Англия Суперкубоги эгаси (2022), Чемпионлар лигаси ғолиби (2018/19) бўлган, шунингдек УЕФА Суперкубоги (2019) ва клублар ўртасидаги жаҳон чемпионатида (2019) ғолиб чиққан.

Шунингдек, Португалия миллий жамоаси сафида икки бор Миллатлар лигаси ғолиблигини қўлга киритган. Миллий жамоа сафида у 46 ўйинда майдонга тушиб, 14 гол урган.

Португалиялик футболчи шу кунларда ижтимоий тармоқлардаги саҳифаларида июн ойи охирида ўтказилган тўйидан фотосуратларни бўлишганди. У ўз қайлиғи Руте Кардоза билан муносабатларини расмийлаштирганди.