Amazon раҳбари компаниянинг 737 млн долларлик акцияларини сотди

Жефф Безос сўнгги йилларда мунтазам равишда компания акцияларини сотяпти. Шунга қарамай, у Amazonʼнинг энг йирик акциядорилигича қолмоқда.

Фото: AP

Amazon асосчиси Жефф Безос июн охирларида компаниясининг 3,3 миллиондан ортиқ акцияларини жами 736,7 миллион долларга сотди. Бу ҳақда АҚШ Қимматли қоғозлар ва биржалар бўйича комиссиясига йўлланган ҳужжатларда сўз боради.

Қайд этилишича, қимматли қоғозлар март ойида эълон қилинган режа асосида сотувга чиқарилган. Ушбу режа 2026 йил 29 майгача Amazonʼнинг 25 миллионтагача акцияларини сотишни назарда тутади.

Жефф Безос сўнгги йилларда мунтазам равишда компания акцияларини сотяпти, бироқ у ҳанузгача Amazonʼнинг энг йирик якка тартибдаги акциядори бўлиб қолмоқда. 2022 йилдан бери у Amazonʼнинг тахминан 44 миллиард долларлик акцияларини сотган.

Олдинроқ у ҳар йили Amazonʼнинг 1 миллиард долларлик акцияларини сотишни режалаштираётганини айтганди — бу маблағлар унинг аэрокосмик компанияси Blue Origin фаолиятини молиялаштириш учун ишлатилади.

Жорий йил бошидан буён Amazonʼнинг капитализацияси 0,5 фоизга ўсиб, 2,34 триллион долларга етган.

#Amazon #Жефф Безос