Мерц: Путин билан телефон орқали мулоқотдан воз кечган маъқул

Германия канцлери Фридрих Мерц 27 июн, жума куни чоп этилган Züddeutsche Zeitung газетасига берган интервюсида Россия президенти Владимир Путин билан ҳозирча телефонда гаплашиш ниятида эмаслигини маълум қилди.

«Россия Федерацияси Венгрия бош вазири (Виктор Орбан)нинг Москвага ташрифига Киевни, жумладан, касалхонани кучли бомбардимон қилиш билан жавоб берди. Охирги қўнғироқ (Путинга) мендан аввалги канцлер (Олаф Шолц) томонидан қилингач, болалар касалхонасига зарба берилди. Агар Россия президентининг телефон орқали суҳбати шундай оқибатларга олиб келса, унда ўзимни тия қоламан», — деди Германия ҳукумати раҳбари.

«Аслида, тинчликка эришишнинг ҳар қандай йўлини излаш тўғри», деб ҳисоблайди Германия канцлери, аммо Россия Федерациясига нисбатан Иккинчи жаҳон уруши бошланишидан олдин қилинган хатога йўл қўймаслик керак. Унинг айтишича, у Буюк Британия бош вазири Невилл Чемберлен ва унинг тинчлантириш сиёсати ҳақида китоб ўқияпти, аммо бундай сиёсат муваффақиятсизликка учраган.

19 июн куни Путин европалик сиёсатчилар билан мулоқотга тайёр эканини айтди. Хусусан, Мерц, Россия президентининг сўзларига кўра, «унга қўнғироқ қилиши мумкин». 

Германия канцлери, шунингдек, АҚШ президенти Доналд Трампда Россияга нисбатан «скепсис кучайиб бораётгани» ва ўзини «танқидийроқ» тутаётгани ҳақида фикр билдирди. «Европада бу уруш (Россия Украинага қарши) борасида кенг консенсус мавжуд. Менимча, президент Трамп бу баҳога яқинлашмоқда», — деди Мерц.

Бундан ташқари, у АҚШнинг Россияга қарши эҳтимолий янги санкциялари АҚШ иқтисодига ҳам зарар етказишига қарамай, улар Сенатда қизғин муҳокама қилинаётганини ва «якуний қарор президент томонидан қабул қилинишини» қўшимча қилди. «Мен Европа Иттифоқи ва Қўшма Штатлар параллел равишда қаттиқроқ санкциялар жорий этиши учун барча имкониятларни ишга соламан», — деди Мерц.