ЕИ Россияга қарши тўртта режим доирасида санкциялар киритди

20 май, сешанба куни Брюсселда Европа Иттифоқи давлатлари ташқи ишлар вазирлари томонидан Европа Иттифоқи ташқи ишлар кенгаши йиғилишида Россияга қарши бир вақтнинг ўзида бир нечта санкция режимларининг «тарихдаги энг йирик» қўлланиши маъқулланди. Йиғилиш иштирокчилари Россия Федерациясига нисбатан тўртта санкция режими доирасида чеклов чораларини маъқулладилар: Украинага қарши тажовузкор уруши, инсон ҳуқуқларини қўпол равишда бузгани, Ғарб давлатларига қарши гибрид фаолияти ва кимёвий қурол ишлатгани учун. Ҳаммаси бўлиб 130 дан ортиқ индивидуал санкциялар, жумладан, Россия ҳарбий-саноат комплекси, «соядаги флоти» ва унинг шерикларига, учинчи мамлакатлардан Россия учун санкцияланган товарларни етказиб берувчиларга, шунингдек, ташвиқот ва дезинформация тарқатувчиларга нисбатан қабул қилинди.

Россиянинг Украинадаги тажовузи учун жазоларнинг 17-тўплами доирасида санкция рўйхатига 75 та янги юридик ва жисмоний шахслар, шунингдек, 189 та «соядаги флот» кемалари киритилди. Бу Европа Иттифоқининг расмий журналида чоп этилган ҳужжатга кўра, Европа Иттифоқи рўйхатидаги шахслар сонини 2400 дан ортиқ, кемалар сонини эса 342 тага етказади.

Янги чекловлар, хусусан, «КАМАЗ» бош директори Сергей Когогин ва «Сургутнефтегаз» нефть компаниясига таъсир кўрсатди. Умуман олганда, ушбу ҳужжат биринчи навбатда қурол ва ҳарбий техника, жумладан, дронларни ишлаб чиқариш билан боғлиқ бўлган 17 жисмоний ва 58 юридик шахсни ўз ичига олади.

Гибрид фаолият учун Европа Иттифоқининг санкциялар режими доирасида Россия Федерациясида 27 жисмоний ва юридик шахсларга нисбатан чоралар, шунингдек, индивидуал жазо чоралари жорий этилди.

Европа Иттифоқининг инсон ҳуқуқларини бузганлик учун глобал санкция режими доирасида Россиядан яна 28 нафар жисмоний ва юридик шахс санкциялар рўйхатига қўшилди. Улар орасида сиёсий маҳбус Алексей Гориновга нисбатан айблов ҳукмини чиқарган судья Олеся Менделеева ва шу маҳкамада давлат айбловчиси сифатида ишлаган Светлана Журавлева ҳам бор. Қолганларнинг ҳаммаси судьялар, прокурорлар ва терговчилардир, шунингдек, Федерал жазони ижро этиш хизматининг бир ходими бор.

Украинада «кимёвий қуролнинг тарқалиши ва қўлланиши» билан боғлиқ алоҳида рўйхат тасдиқланди. Унинг таркибига Россия Мудофаа вазирлигининг радиация, кимёвий ва биологик мудофаа қўшинлари ва иккита идоравий илмий-тадқиқот институтлари кирган.