Тутанхамон хазинасининг бир қисми янги музейга кўчирилди

Гизадаги Катта Миср музейига олиб келинган коллекция орасида Тутанхамоннинг тахти, шунингдек, олтиндан ясалган заргарлик буюмлари ва маржонлар мавжуд.

Фото: РИА Новости

Фиръавн Тутанхамон хазиналари коллекциясининг бир қисми янги музейга кўчирилди. Бу ҳақда Миср Туризм вазирлиги хабар берди.

Қайд этилишича, 163 та артефакт Гизадаги Катта Миср музейига етказилган бўлиб, унинг расмий очилик маросими 3 июл санасига режалаштирилган.

Туризм вазири Шариф Фатҳининг сўзларига кўра, Тутанхамоннинг «олтин коллекцияси»даги экспонатларнинг бир қисми музейнинг расмий очилишига сўнгги тайёргарликлар доирасида олиб келинган. Шунингдек, у ерга бошқа артефактлар ҳам келтирилиши кутилмоқда.

Экспонатлар орасида Тутанхамоннинг тахти, шунингдек, олтиндан ясалган заргарлик буюмлари ва маржонлар мавжуд. Тутанхамон қабри 1922 йилда Луксордаги Подшоҳлар водийсида қазиш ишлари чоғида британиялик археолог Говард Картер томонидан топилган.

Кейинчалик ушбу коллекция, жумладан, олтин ниқоб ҳам, Қоҳирада жойлашган Таҳрир майдонидаги Миср музейида намойиш этилган. Гизада қурилаётган янги музейда эса Тутанхамон хазиналари учун алоҳида зал ажратилади. Миср ҳукумати янги музейни «дунёга туҳфа» деб атамоқда ва очилиш маросимига давлат раҳбарларини таклиф қилишни режалаштирмоқда.

Эслатиб ўтамиз, феврал ойида Буюк Британия ва Миср археологлари Фива қабристонида милоддан аввалги 1500 йиллар атрофида Қадимги Мисрда ҳукмронлик қилган фиръавн Тутмос ИИ қабрини топгани тўғрисида хабар берилганди.

#Тутанхамон #Миср