ФХХ: Россияга келаётган Шимолий Корея фуқаролари сони кескин камайди

Жорий йил биринчи чорагида Россияга 300 га яқин КХДР фуқароси келган, 2024 йилда эса ушбу кўрсаткич 13 минг кишини ташкил этган.

Фото: LiveJournal

Федерал хавфсизлик хизмати Чегара хизмати маълумотларига кўра, Россияга келаётган КХДР фуқаролари сони 2025 йилдан бошлаб кескин камайган, деб ёзмоқда «Медиазона».

ФХХ эълон қилган статистикада келтирилишича, жорий йилнинг биринчи чорагида Россияга 300 га яқин КХДР фуқароси келган, уларнинг уч нафари сафар мақсади сифатида «ўқишни» кўрсатган.

2024 йилда Шимолий Корея фуқаролари Россияга 13 минг маротаба ташриф буюрган. ФХХ статистикасига кўра, 2024 йилнинг иккинчи ярмида РФга «ўқиш» учун келган КХДР фуқаролари сони кескин ошган. Шу билан бирга, Россия ОТМда хорижликлар учун квота олдингидек ўзгаришсиз қолмоқда.

2024 йил кузда Шимолий Корея Россияга ўз ҳарбийларини юборган эди. Жанубий Корея разведкаси уларнинг сони 15 мингга яқин бўлиши мумкинлигини билдирган.

РФ ва КХДР ҳукуматлари Шимолий Корея ҳарбийлари Россия томонида туриб жанг қилаётганини бир неча ой давомида тасдиқламай келди. Апрел охирларига келибгина КХДР қўшинлар РФга Ким Чен Иннинг буйруғи билан юборилганини эълон қилди.

Аввалроқ The Wall Street Journal Шимолий Корея Россияга 15 мингга яқин ишчи юборгани тўғрисида ёзганди. КХДРдан кўплаб меҳнат муҳожирлари Россия Федерациясига талаба визаси билан кирган.

#Россия #КХДР