Ўзбекистонда Франция университетини очиш режалаштирилмоқда

Ўзбекистон ТИВ раҳбари маслаҳатчиси Франция элчиси билан қўшма таълим лойиҳаларини ишлаб чиқиш масалаларини муҳокама қилди.

Ўзбекистон ташқи ишлар вазири маслаҳатчиси Мунира Аминова Франция элчиси Орелия Бушез билан учрашув ўтказди.

ТИВ маълумотига кўра, учрашувда икки томонлама ҳамкорликнинг долзарб масалалари, иқтисодий дипломатияни ривожлантириш, шунингдек, ўзаро ҳамкорлик соҳаларида тажриба алмашиш юзасидан фикр алмашилди.

Таълим лойиҳаларини ишлаб чиқиш, жумладан, француз мактаби фаолияти ва Франция университетини очиш режаларига алоҳида эътибор қаратилди. Ушбу ташаббуслар маданий ва академик алоқаларни мустаҳкамлаш, шунингдек, талабалар ва ўқитувчилар учун янги имкониятлар яратиш учун мўлжалланган.

Учрашув конструктив ва дўстона руҳда ўтгани шериклик муносабатларининг юқори даражаси ва ўзаро манфаатли ҳамкорликни янада ривожлантириш истагини тасдиқлади.

#университет #Франция