Исроилда ўрмонларга ўт қўйишда гумонланган 18 киши қўлга олинди

Исроил ҳукумати Қуддус яқинидаги ўрмонларга ўқ қўйишда гумонланган 18 кишини қўлга олди. Бу ҳақда мамлакат бош вазири Бинямин Нетаняҳу маълум қилди.

Унинг сўзларига кўра, гумонланувчилардан бири ўт қўяётган жойида ушланган. Шу билан бирга, The Times of Israel’нинг мамлакат ёнғин-қутқарув хизматига таяниб ёзишича, кенг кўламли ўрмон ёнғинлар нима сабабдан юзага келгани ҳали аниқ эмас.

Яҳудий миллий жамғармаси («Карен Каемет ле-Исраэл) маълумотларига кўра, 30 апрел куни эрталаб бошланган ёнғинлар ҳозирга қадар Қуддус атрофидаги 2 минг гектарга яқин ерни яксон қилган. Бейт-Шемеш шаҳри яқинида жойлашган «Канада» миллий боғи деярли бутунлай ёниб кетган.

Ўрмон ёнғинларини ўчириш ишлари давом этмоқда. Бир кун олдин ёпилган йўллар, жумладан, Шоссе 1 очиб юборилган. Ёнғин туфайли кеча эвакуация қилинган аҳоли пунктларининг айримларига фуқароларнинг қайтишига рухсат берилган.

Исроил ҳукумати Италия, Хорватия, Болгария, Греция ва Кипрдан ёнғинни ўчиришда ёрдам сўраган. Халқаро ёрдам мамлакатга 1 май куни етиб келиши кутилмоқда.