Украина ТИВ Путин томонидан эълон қилинган оташкесим бўйича изоҳ берди

Агар Россия ҳақиқатан ҳам тинчликни хоҳласа, дарҳол ўт очишни тўхтатиши керак. 8 майгача кутишнинг нима кераги бор?, деди ТИВ раҳбари.

Фото: Getty images

Украина ташқи ишлар вазири Андрей Сибига, агар Россия ҳақиқатан ҳам тинчликни истаса, уни рамзий саналарга боғламай, ҳозироқ ўт очишни тўхтатиши кераклигини айтди.

Украина ТИВ раҳбари Кремлнинг 9 май Ғалаба кунининг 80 йиллиги муносабати билан бир томонлама ўт очишни тўхтатиш тўғрисида эълон қилган баёнотига шундай изоҳ берди.

«Агар Россия ҳақиқатан ҳам тинчликни хоҳласа, дарҳол ўт очишни тўхтатиши керак. 8 майгача кутишнинг нима кераги бор? Агар ўт очишни ҳозир ва исталган санадан 30 кунга тўхтатиш мумкин бўлса – бу шунчаки парад учун эмас, балки ҳақиқий бўлиши керак. Украина узоқ муддатли, ишончли ва тўлиқ ўт очишни тўхтатишни қўллаб-қувватлашга тайёр. Ва биз буни доимий равишда таклиф қиламиз – камида 30 кунга», деб ёзди Сибига ижтимоий тармоғида.

28 апрель куни Кремль Ғалабанинг 80 йиллиги муносабати билан «инсонпарварлик нуқтаи назаридан» ўт очишни тўхтатиш режимини эълон қилди. Оташкесим 8 май ярим тундан 11 майга ўтар кечасигача амал қилади. Кремль Украинани «бундан ўрнак олиш»га, шунингдек, барча ҳарбий ҳаракатларни тўхтатишга чақирди.

Аввалроқ Владимир Путин Пасха байрамида ўт очишни тўхтатиш режимини эълон қилган эди, у 19 апрелдан 21 апрелгача амалда бўлди. Кўп ўтмай, Москва ва Киев бир-бирини Пасха сулҳига бир неча бор риоя қилмасликда айблади.

#Украина #Россия #Андрей Сибига