Абу-Дабида Россия ва АҚШ ўртасида маҳбуслар алмашинуви бўлиб ўтди

Россия ва АҚШ 10 апрел куни эрталаб «икки давлат ўртасидаги ишончни мустаҳкамлашнинг давоми сифатида» Абу-Даби шаҳрида маҳбуслар алмашинувини амалга оширди, деб хабар беради The Wall Street Journal.

Россия АҚШ ва РФ фуқароси Ксения Карелинани озод этди. У Украинадаги хайрия ташкилотига пул ўтказгани учун давлатга хиёнатда айбланиб, 12 йилга озодликдан маҳрум этилган эди. Карелинанинг ҳимоячиси Михаил Мушаилов ўз мижози озодликка чиққанини тасдиқлаган.

Ўз навбатида, АҚШ Германия ва Россия фуқароси Артур Петровни озод этди. У 2023 йилда Кипрда АҚШнинг сўровига кўра қўлга олинган эди. Петров АҚШ томонидан ҳарбий мақсадларда фойдаланилиши мумкин бўлган микроэлектроника маҳсулотларини ноқонуний экспорт қилишда гумонланган.

Нашр маълумотларига кўра, алмашинув музокараларини МРБ директори Жон Рэтклифф олиб борган. У Россия ФХХ директори Александр Бортников ва Ташқи разведка хизмати раҳбари Сергей Наришкин билан бир неча марта телефон орқали мулоқот қилган.

Рэтклифф Абу-Даби аэропортидаги алмашинувда шахсан иштирок этган. «Бугун президент Трамп Россияда ноқонуний равишда ушлаб турилган яна бир америкаликни уйига қайтарди. Бу жараёнда фаол қатнашган МРБ ходимлари билан фахрланаман ва алмашинувни ташкил қилгани учун БАА ҳукуматига миннатдорчилик билдираман», — дейди Рэтклифф.

ФХХ ҳам Россия ва АҚШ ўртасида маҳбуслар алмашинуви амалга оширилганини тасдиқлади. Россия махсус хизматининг хабарида айтилишича, озод этилган Ксения Карелина апрел ойида Владимир Путин фармони билан афв этилган.

Бу Доналд Трамп АҚШ президент лавозимига киришганидан бери Москва ва Вашингтон ўртасида иккинчи бор маҳбуслар алмашинувидир. Февралда Россия америкалик ўқитувчи Марк Фогелни қамоқдан озод этганди. Бунга жавобан АҚШ BTC-e криптобиржаси асосчиси Александр Винникини қўйиб юборган.