Филиппиндаги Канлаон вулқони ҳаракатга келди

Негрос оролининг марказий қисмида жойлашган вулқон 4 минг метр баландликка кул отди.

Фото: Видеодан кадр

Филиппиндаги Негрос оролида Канлаон вулқони ҳаракатга келди. Вулқон жойлашган ҳудудда учинчи хавф даражаси эълон қилинди, деб ёзмоқда Euronews.

Филиппиндаги энг қадимий вулқонлардан бири — Канлаон яна ҳаракатга келди. Сейсмологларнинг маълумотларига кўра, у 4 минг метр баландликка кул отган.

Денгиз сатҳидан 2465 метр баландликдаги Канлаон Негрос оролининг марказий қисмида жойлашган. Ўтган йил декабрда ушбу вулқон отилишни бошлагани сабаб атрофдаги қишлоқлар аҳолиси эвакуация қилинган эди.

Шундан буён Канлаон ҳудудида учинчи хавф даражаси сақланиб қолмоқда — бу лава отилиши эҳтимоли юқори эканини англатади. Мутахассисларнинг айтишича, яқин вақтлар ичида хавф даражаси ўзгартирилиши — кўтарилиши ёки туширилиши мумкин. Бу магма ер юзаси томон қандай тезликда ҳаракатланишига боғлиқ.

Филиппин «Тинч океани оловли ҳалқаси»да жойлашган. Ушбу ҳудудда вулқонлар фаоллиги юқори ва тез-тез зилзила содир бўлиб туради.

Аввалроқ Ҳавайида 2024 йил охирларида ҳаракатга келган Килауэа вулқонининг отилиши давом этаётгани тўғрисида хабар берилганди. Унинг янги фаоллик фазаси 25 март куни бошланган ва эртаси куниёқ вулқон лавалари 200 метрдан ортиқ баландликка отилган. Шунингдек, апрел бошида Исландия жануби-ғарбидаги Рейкянес яриморолида жойлашган Сундҳнукур вулқони яна фаоллашган.

#Филиппин #вулқон