Трамп АҚШ Гренландияни қўшиб олишига ишоняпти

Америка Қўшма Штатлари Гренландияни аннексия қилади, Доналд Трампнинг бунга ишончи комил. 13 март, пайшанба куни Оқ уйда НАТО бош котиби Марк Рютте билан учрашувда АҚШ президенти оролнинг аннексия қилиниши мумкинлиги ҳақидаги саволга «Ўйлайманки, шундай бўлади», деб жавоб берди. «Бизга бу (Гренландия) халқаро хавфсизлик учун керак», деб тушунтирди Трамп. У, шунингдек, Рютте Гренландиянинг АҚШга қўшилишида «муҳим рол» ўйнашига ишонч билдирди.

Ўз навбатида, Марк Рютте «НАТОни бу масала бўйича муҳокамаларга тортмоқчи эмаслигини» айтди, лекин Россия ва Хитойнинг ушбу минтақага қизиқиши ортиб бораётганлиги сабабли Арктика хавфсизлиги учун Гренландия муҳимлигини тан олди.

Гренландияни ўз ичига олган Дания парламентининг мудофаа қўмитаси раиси Расмус Ярлов ўзининг Х ижтимоий тармоғидаги саҳифасида АҚШнинг оролга даъволари «икки НАТО давлати ўртасида урушга» олиб келиши мумкинлигини ёзди ва Марк Рюттенинг Трамп билан учрашувдаги хатти-ҳаракатларини ҳам танқид қилди. «Гренландия Даниядан дарҳол мустақилликка қарши овоз берди ва ҳеч қачон Американики бўлишни хоҳламайди», дея қўшимча қилди Ярлов.

Германия ва Франция Трампнинг таҳдидлари фонида Данияни қўллаб-қувватламоқда

Дания бош вазири Метте Фредериксен 28 январ куни Берлинда Германия канцлери Олаф Шолц билан АҚШнинг янги президенти Доналд Трампнинг Дания қироллиги таркибига кирувчи Гренландия устидан назоратни ўз қўлига олиш ҳақидаги такрорий таҳдидлари фонида Европа бирлиги масаласини муҳокама қилди. Фредериксен қўшма матбуот баёнотида «Европа бирлиги ва яқин ҳамкорликни» янада долзарб қиладиган «ноаниқ ҳақиқатлар» ҳақида гапирди, деб хабар беради AFP.

Ўз навбатида, Олаф Шолц «чегараларни куч билан ўзгартирмаслик» кераклигини таъкидлаб, «ким таъқиб қилишидан қатъий назар» экспанционистик интилишларни қоралади.

Дания бош вазири Шолц билан учрашувдан сўнг Париж ва Брюсселга ташриф буюрди ва у ерда Франция президенти Эммануэл Макрон ва НАТО бош котиби Марк Рютте билан учрашди. «Сиз давлатлар ҳудудлари ва суверенитетини ҳурмат қилишингиз керак. Бу биз Иккинчи жаҳон урушидан бери бирга қурган халқаро ҳамжамиятнинг асосий элементидир», — деди Фредериксен Макрон билан учрашувидан кейин.