Аргентина ҳам ЖССТдан чиқишини эълон қилди

Аргентина Жаҳон соғлиқни сақлаш ташкилотидан чиқади. Бу ҳақда мамлакат президентининг матбуот котиби Мануэл Адорни маълум қилди.

Қайд этилишича, Аргентина президенти Хавер Милейнинг қарори «соғлиқни сақлаш сиёсати бўйича, айниқса, (COVID-19) пандемия давридаги чуқур келишмовчиликларга асосланган». Адорнининг қўшимча қилишича, Аргентина ҳукумати «халқаро ташкилотнинг суверенитетга аралашувига йўл қўймайди».

Аргентина ҳукумати халқаро ташкилотдан чиқиш тўғрисидаги қарорни Доналд Трамп АҚШнинг ЖССТдан чиқишига оид фармонни имзолаганидан икки ҳафта ўтиб қабул қилмоқда. Ҳужжатга мувофиқ, АҚШ ЖССТга ҳар қандай турдаги воситалар берилишини тўхтатади, шунингдек, ЖССТда ишловчи барча ходим ва пудратчиларини чақириб олади.

Фармонда белгиланишича, ЖССТ АҚШдан бошқа мамлакатларнинг бадалларига нисбатан номутаносиб равишда катта «тўлов талаб қилади». Бундан ташқари, Трамп ЖССТни зарур ислоҳотларни амалга ошира олмаётганликда ва «ташкилот аъзоларининг номақбул сиёсий таъсирига боғланиб қолганликда» айблаган.

Доналд Трамп биринчи президентлик муддати даврида ҳам Жаҳон соғлиқни сақлаш ташкилотини молиялаштиришни тўхтатган эди. Трампнинг фикрига кўра, ташкилотнинг хатти-ҳаракатлари Хитойнинг COVID-19 коронавируси ҳақида «нотўғри маълумот тарқатишига»га ёрдам берган, бу касаллик кўпроқ авж олишига олиб келган.