Навоийда божхоначилар томонидан уч ойда 201 та ҳуқуқбузарлик ҳолати аниқланди

Январ-март ойларида вилоятдаги божхона постларида ноқонуний олиб ўтишга уринилган 1,5 млрд сўмлик товар-моддий бойликлар ушлаб қолинган. Бу ҳақда Kun.uz’га вилоят божхона бошқармаси ахборот хизмати хабар берди.

Фото: Навоий вилояти божхона бошқармаси

Маълум қилинишича, бошқарма томонидан 2022 йилнинг 1-чорагида 306,6 млрд сўмлик божхона тўловлари ундирилган. Ташқи иқтисодий фаолият иштирокчиларини қўллаб-қувватлаш мақсадида божхона тўловларидан 311,1 млрд сўм имтиёзлар берилган. Имтиёз асосан транспорт воситалари ва унинг эҳтиёт қисмлари, технологик асбоб-ускуналар, фармацевтика маҳсулотлари, тиббиёт асбоб-ускуналари ҳамда маиший-техника каби товарларга қўлланган.

Ўтган уч ойда вилоятдан 25 га яқин чет давлатга 119,4 млн долларлик товарлар экспорт қилинган. Экспортга йўналтирилган товарларнинг асосий қисмини табиий қазилмалар, металлар ва улардан тайёрланган буюмлар, калава ип, тўқимачилик ҳамда озиқ-овқат маҳсулотлари ташкил қилмоқда.

Шунингдек, январ-март ойларида божхона постларида 201 та ҳуқуқбузарлик ҳолати аниқланиб, далилий ашё сифатида 1,5 млрд сўмлик товар-моддий бойликлар ушлаб қолинган. Ушбу ҳолатлар бўйича 13,6 млрд сўм қўшимча божхона тўловлари ҳисобланган.

#Навоий вилояти #божхона #ҳуқуқбузарлик