Xitoyda odamsimon robotlarning dunyodagi birinchi do‘koni ochildi

Pekinda odamsimon robotlar savdosi bo‘yicha dunyodagi birinchi do‘kon ochildi. Androidlarning narxi 2000 yuandan (≈ 3,5 mln so‘m) boshlanib, bir necha milliongacha yetadi, deb yozdi BBC.

Robot Mall 3 qavatli bo‘lib, biznes uchun ham, shaxsiy foydalanish uchun ham 100 dan ortiq modellarni taklif etadi. Ular orasida interaktiv robot itlardan tortib odamsimon robotlargacha bor. Modellardan biri Albert Eynshteyn qiyofasida.

Shuningdek, hududda kichik muzey, demo-zona va xizmat ko‘rsatish markazi mavjud bo‘lib, u yerda odamsimon robotni ta’mirlash yoki ehtiyot qismlarga buyurtma berish mumkin. Do‘kon marketing va savdo sohasida tajribasi yetarli bo‘lmagan robot ishlab chiqaruvchilarni qo‘llab-quvvatlamoqda.

Global Times ma’lumotlariga ko‘ra, 2024 yilda robototexnika bo‘yicha dunyodagi barcha patent arizalarining uchdan ikki qismi Xitoy ulushiga to‘g‘ri kelgan. Bir yil ichida mamlakatda 556 mingta sanoat roboti ishlab chiqarildi, bu esa Xitoyga ushbu sohadagi eng yirik ishlab chiqaruvchi maqomini berdi.

Avvalroq Xitoyda birinchi marta universitetga odamsimon robot qabul qilingani ijtimoiy tarmoqlarda qizg‘in muhokamalarga sabab bo‘lgan edi. Ta’limni tugatgandan so‘ng, u boshqa talabalar kabi dissertatsiya yozishi kutilmoqda.