Rossiyaga qarshi sanksiyalarga tayyor Tramp, «Hizbulloh»ni qurolsizlantirmoqchi bo‘lgan Livan va Eronda yopilayotgan davlat idoralari - kun dayjesti

O‘tgan kun davomida jahonda ro‘y bergan eng asosiy voqea va yangiliklar sharhi bilan kundalik xabarnomada tanishtiramiz.

{Yii::t(}

O'tkazib yuborish 6s

O'tkazib yuborish

Tramp Rossiyaning «soyadagi floti»ga qarshi sanksiyalarga tayyor

AQSh prezidenti Donald Tramp Rossiya prezidenti Vladimir Putinga uni Ukrainadagi urushni tugatishga majburlash uchun «jazo choralari» bilan tahdid qildi, deb yozdi Financial Times gazetasi 5 avgust, seshanba kuni manbalarga tayanib. Xususan, bu Rossiya Federatsiyasining «soyadagi floti»ga qarshi sanksiyalarga tegishli bo‘lib, agar Moskva 8 avgustgacha o‘t ochishni to‘xtatishga rozi bo‘lmasa, Vashington ularni qo‘llashi mumkin, deya aniqlik kiritadi nashr.

Agar xalqaro cheklovlarni chetlab o‘tgan Rossiya neftini olib ketayotgan kemalar qora ro‘yxatga kiritilsa, Tramp joriy yilning yanvar oyida Oq uyga qaytganidan beri AQSh Rossiyaga nisbatan birinchi marta sanksiyalar kiritadi, deya ta’kidlaydi maqola mualliflari.

Nashrga nomi oshkor etilmagan ikki manbaning aytishicha, AQShning Rossiyaning «soyadagi floti»ga qarshi sanksiyalari Rossiyaning yo‘qotishlarga duchor bo‘lishini ta’minlash uchun birinchi oson qadam sifatida ko‘rilmoqda. Jurnalistlarga uchinchi manbaning ta’kidlashicha, «soyadagi flot»ga qarshi sanksiyalar Tramp ma’muriyati ko‘rib chiqayotgan cheklov choralarining bir nechta variantlaridan biri xolos.

Iyul oyida YeI Rossiya «soyadagi floti»ning sanksiya ostidagi kemalari ro‘yxatini 415 tagacha oshirdi va unga yana 100 ta tankerni qo‘shdi.

Sirskiy: Rossiyaning maqsadi - yil oxirigacha yana 10 ta diviziyani tuzish

Kiyevga ko‘ra, Rossiya Ukrainaga qarshi o‘z tomonida jang qilayotganlar sonini oyiga 9 ming kishiga oshirmoqda. Shu bilan birga, Ukraina Qurolli kuchlari bosh qo‘mondoni Aleksandr Sirskiy Rossiya rahbariyatining maqsadi sifatida joriy yil oxirigacha o‘nta yangi diviziya tashkil etishni keltirdi. Uning so‘zlariga ko‘ra, ulardan ikkitasi allaqachon tuzilgan. Bu haqda Sirskiy 5 avgust, seshanba kuni Ukraina Qurolli kuchlarining iyul oyidagi faoliyati yakunlariga bag‘ishlangan yig‘ilishdan so‘ng Facebookʼdagi postida yozgan.

Rossiya kontingenti soni ortib borayotgani fonida Kiyevning safarbarlik tadbirlarini davom ettirish, jangovar tayyorgarlikni yaxshilash va qo‘shinlarning uchuvchisiz tarkibini kuchaytirishdan boshqa chorasi yo‘q, dedi Sirskiy.

Uning so‘zlariga ko‘ra, iyul oyi Ukraina uchun juda keskin oy bo‘ldi, chunki Rossiya armiyasi «deyarli barcha jangovar harakatlar chizig‘i bo‘ylab oldinga siljishga harakat qildi». Shu bilan birga, ruslar kichik hujumkor guruhlarni hujum qilish uchun ishlatib, «mayda kesish» taktikasini qo‘lladi.

«Eng og‘ir vaziyat Pokrovsk, Dobropole va Novopavlovo yo‘nalishlarida. Shu bilan birga, Severo-Slobojansk yo‘nalishida biz Sumi viloyati hududini ozod qilishda muvaffaqiyatga erishdik va Kursk viloyatida harbiy amaliyotlar o‘tkazishda davom etmoqdamiz», — dedi Aleksandr Sirskiy.

Livan armiyasi «Hizbulloh»ni qurolsizlantirish rejasini ishlab chiqadi

Livan hukumati mamlakat qurolli kuchlariga «Hizbulloh» harakati va boshqa qurolli guruhlarni qurolsizlantirish rejasini ishlab chiqish bo‘yicha ko‘rsatma berdi, dedi 5 avgust, seshanba kuni kechqurun bosh vazir Navaf Salom.

Olti soatlik hukumat yig‘ilishidan so‘ng hukumat Livan Qurolli kuchlaridan joriy yil oxirigacha hukumat kuchlari uchun qurol-yarog‘ monopoliyasini ta’minlash rejasini taqdim etishni talab qildi, deb xabar beradi AFP va Reuters.

Avvalroq «Hizbulloh» yetakchisi Naim Qosim «Isroil Livanga hujum qilishda davom etar ekan», o‘z harakatini qurolsizlantirishdan bosh tortgan edi. «Isroil agressiyasi» to‘xtamaguncha, «Hizbulloh» qurolsizlanish bo‘yicha hech qanday taklifni qo‘llab-quvvatlay olmaydi, dedi Qosim o‘z tarafdorlariga telemurojaatida. Uning AFP tomonidan keltirilgan so‘zlariga ko‘ra, Livan hukumati «Hizbulloh»ni zaiflashtirish va shu orqali «Isroilga qarshilik ko‘rsatish» o‘rniga, «bosim va tahdidlarga» qarshi turish rejasini ishlab chiqishi kerak.

Vazirlar mahkamasi yig‘ilishidan oldin Livan prezidenti Jozef Aun mamlakat vazirlar mahkamasi «barcha qurolli guruhlar, jumladan, «Hizbulloh»ning qurollarini tortib olishga» qat’iy qaror qilganini ma’lum qildi. Bu qadamdan maqsad butun Livanga davlat suverenitetini kengaytirish va uning himoyasini faqat hukumat qurolli kuchlari orqali ta’minlashdan iborat, dedi u.

Ruminiya sobiq prezidenti Ion Iliyesku 95 yoshida vafot etdi

Ruminiyaning sobiq prezidenti, 1989-1996 va 2000-2004 yillarda mamlakatni boshqargan Ion Iliyesku 5 avgust, seshanba kuni 95 yoshida vafot etdi.

Mamlakat hukumati tarqatgan bayonotda aytilishicha, siyosatchi professor Agrippa Ionesku nomidagi klinik tez yordam shifoxonasida vafot etgan. Tibbiyot markazi sobiq prezident mahalliy vaqt bilan soat 15:55 da vafot etganini ma’lum qildi. Iliyesku u yerda iyun oyining boshidan beri edi, u intensiv terapiya bo‘limiga yotqizilgan va unga o‘pka saratoni tashxisi qo‘yilgan. O‘tgan hafta shifokorlar siyosatchining ahvoli «og‘ir» ekanini ma’lum qilgan edi.

Iliyesku 1930 yil 3 martda tug‘ilgan. Katta siyosatdagi faoliyatini 1967 yilda yoshlar ishlari vaziri sifatida boshlagan. O‘sha paytda mahalliy hukmron Kommunistik partiya va Ruminiya Sotsialistik Respublikasi Kengashiga Nikolaye Chaushesku rahbarlik qilgan.

1989 yildagi inqilob natijasida Chaushesku rejimi qulaganidan so‘ng hokimiyat tepasiga Iliyesku keldi va o‘zini o‘tish davri hukumati rahbari deb e’lon qildi. 1990 yil may oyida u mamlakatdagi birinchi demokratik saylovlarda g‘alaba qozondi. 2004 yilda ikkinchi prezidentlik muddati tugagach, Iliyesku Ruminiyaning NATOga qo‘shilishiga erishdi va mamlakat 2007 yilda qo‘shilgan Yevropa Ittifoqi bilan assotsiatsiya shartnomasini imzoladi.

Eronda jazirama tufayli davlat idoralari va banklar yopiladi

Eron rasmiylari 5 avgust, seshanba kuni davlat televideniyesi orqali Tehrondagi, shuningdek, mamlakatning 31 viloyatidan 15 tasida davlat idoralari va banklari chorshanba kuni suv ta’minoti holatining yomonlashishi va elektr tarmog‘idagi yuklamaning oshishiga olib kelgan jazirama tufayli yopilishini ma’lum qildi. Shu bilan birga, tibbiyot muassasalari, xususiy kompaniyalar va ayrim bank filiallari faoliyatini davom ettiradi.

Eronda iyul oyi o‘rtalaridan beri jazirama davom etmoqda va kamida yana besh kun davom etadi. Vaziyat mamlakat janubida eng og‘ir, masalan, Obodon shahrida 3 avgust kuni havo harorati +50°C dan yuqori bo‘lgan. Eron viloyatlarida jazirama tufayli dam olish kunlari 2025 yil iyul oyining oxiri va 2024 yil, shuningdek, 2023 yilning avgustida ham e’lon qilingan. Rasmiylar muassasalar ishidagi pauza suv va elektr energiyasi iste’molini qisqartirishiga umid qilmoqda.

Ta’kidlanishicha, ayni paytda mamlakatda soatiga 62 ming megavatt elektr energiyasi ishlab chiqarilayotgan bo‘lsa, eng yuqori yuklamalar vaqtida unga 80 ming megavatt kerak bo‘ladi. Bu sohadagi inqiroz tufayli Tehron va mamlakatning boshqa shaharlari ham har kuni 2-4 soatga elektr energiyasini o‘chirishni boshladi. Bu allaqachon Tavanir davlat energetika kompaniyasi binosi oldida norozilik namoyishlariga sabab bo‘ldi.

Ayni paytda mamlakatdagi ko‘plab korxonalarda jazirama tufayli haftasiga to‘rt kun elektr energiyasi bo‘lmayapti, deb yozadi Shargh mahalliy gazetasi. Natijada, ishlab chiqarish darajasi 2020 yilda, koronavirus pandemiyasi faoliyatni to‘xtatganida kuzatilgan darajaga tushdi. Eron ommaviy axborot vositalari mamlakat so‘nggi o‘n yilliklardagi eng yomon qurg‘oqchilikni boshdan kechirayotgani haqida xabar bermoqda.