Tramp Uitkoffning Rossiyaga bo‘lajak tashrifi haqida e’lon qildi

AQSh prezidentining maxsus vakili Stiven Uitkoff Rossiyaga tashrif buyuradi. Bu haqda 31 iyul, payshanba kuni AQSh yetakchisi Donald Tramp Oq uyda ma’lum qildi.

Tramp Uitkoffning rejalashtirilgan safari tafsilotlarini keltirmadi. Moskvaga avvalgi tashriflari chog‘ida u, xususan, Rossiya prezidenti Vladimir Putin bilan uchrashgan.

Oq uy rahbari Rossiyaning Ukrainaga qarshi yangi hujumlarini «jirkanch» deb atadi va Moskvaga nisbatan ehtimoliy cheklov choralari haqida e’lon qildi. «Biz sanksiyalar qo‘yamiz. U (Putin) sanksiyalar haqida o‘ylayaptimi yoki yo‘qmi, bilmayman», — deya Trampning so‘zlarini keltirgan AFP.

Ayni paytda, Reuters xabar berishicha, AQSh Senatining mablag‘lar bo‘yicha qo‘mitasi 31 iyul kuni Pentagonga 2026 yil 30 sentabrda yakunlanadigan moliyaviy yil uchun 852 milliard dollar (746 milliard yevro) ajratishni nazarda tutuvchi harbiy xarajatlar to‘g‘risidagi qonun loyihasini ma’qulladi, bu Tramp yil boshida so‘raganidan 2,6 foizga ko‘pdir.