Ohangaronda yuk mashinasi YTH joyida ishlayotgan inspektorlar mashinasini urib yubordi

Bugun, 23 iyul kuni soat tahminan 05:00 larda Toshkent viloyati Ohangaron tumani hududidan o‘tgan A373 Toshkent-O‘sh avtomobil yo‘lining 39-kilometrida 1969 va 1992 yillarda tug‘ilgan haydovchilar boshqaruvidagi Gentra va Cobalt rusumli transport vositalari ishtirokida insonlar jarohat olishiga sabab bo‘lmagan yo‘l-transport hodisasi sodir bo‘lgan.

Yo‘l-transport hodisasi sodir bo‘lgan joyga Lacetti rusumli xizmat avtomobilida yo‘l harakati xavfsizligi xizmati xodimlari yetib borgan va yo‘l-transport hodisasini rasmiylashtirish va ushbu joyda harakat xavfsizligini ta’minlash maqsadida patrul avtomobili mayoqchalarini yoqqan holda qatnov qismining o‘ng bo‘lagiga joylashtirgan.

Shundan so‘ng, 2001 yilda tug‘ilgan haydovchi R.A. HOWO rusumli yuk avtomobilini Toshkent-Olmaliq yo‘nalishida boshqarib kelib, tajribasizligi hamda e’tiborsizligi natijasida Lacetti rusumli patrul avtomobili yon qismiga borib urilishi natijasida yo‘l-transport hodisasi sodir bo‘lgan.

Ushbu holatda harakat ishtirokchilari sog‘lig‘iga ziyon yetmagan. Ikkala yo‘l-transport hodisalari yuzasidan tegishli idoralar tomonidan surishtiruv ishlari olib borilmoqda.