Putin G‘arbni «Rossiyaga qarshi siyosat»ni davom ettirmaslik haqida ogohlantirdi

G‘arbda muammolar ko‘proq va ular Rossiyanikiga qaraganda ancha keskin. Ammo G‘arb davlatlari o‘z ijtimoiy tizimlarini rivojlantirishdan ko‘ra, Kiyevni qo‘llab-quvvatlashga pul sarflashni afzal ko‘radi. Bu haqda Rossiya prezidenti Vladimir Putin Xalq fronti tomonidan tashkil etilgan «Hammasi g‘alaba uchun!» forumida so‘zlagan nutqida aytib o‘tdi, deya xabar beradi TASS.

Uning so‘zlariga ko‘ra, birgina Butunrossiya xalq fronti liniyasi orqali yetkazib berilgan Rossiya dronlari qiymati 2 milliard dollardan ortiq «dushman texnikasi»ni yoqib yuborgan. «G‘arb davlatlarining soliq to‘lovchilari bu raqamlarni eshitsin va ularning hukumati sog‘liqni saqlash tizimini rivojlantirish (u yerda ko‘p muammolar bor, biz buni yaxshi bilamiz), uy-joy va kommunal xizmatlar, ish haqini oshirish o‘rniga o‘z xalqining pullarini qayerga sarflayotgani haqida o‘ylasin», — dedi Putin. 

U Yevropaga ko‘p miqdorda ko‘chib o‘tayotgan muhojirlarni ish bilan ta’minlashni yana bir shunday yo‘nalish sifatida tilga oldi. «Ularni ish bilan ta’minlash kerak, toki ular mahalliy fuqarolarning ishini emas, balki kerakli joyda ishlasin. Bu har doim ham amalga oshavermaydi. Hamma joyda ham shunday muammolar ko‘p. Bizda ham bor. Lekin ularda yanada o‘tkirroq muammolar bor. Rossiyaga nisbatan shu paytgacha olib borilgan siyosatni qancha davom ettirsa, shuncha yomon bo‘ladi», — dedi Rossiya prezidenti.