Google eng kuchli sun’iy intellekt protsessorini taqdim etdi

Google sun’iy intellekt uchun Ironwood nomli yangi protsessorni taqdim etdi. Ushbu chip kompaniyaning tenzor protsessorlari orasida eng kuchlisi hisoblanadi. Ironwood Gemini kabi ilg‘or sun’iy intellekt modellari bilan ishlash uchun mo‘ljallangan.

Ironwood’ning bitta chipi soniyasiga 4,614 trillion operatsiyani amalga oshirishi mumkin. Bu turdagi chiplardan 9216 tasi yagona klasterga birlashtirilsa, quvvati 42,5 ekzaflopsga teng tizim paydo bo‘ladi. Bu dunyodagi eng kuchli El Capitan superkompyuteridan 24 barobar tez demak.

«Uning ko‘lamini tushunish uchun Yerdagi har bir inson bir vaqtda soniyasiga 5000 tadan matematik masalani yechayotgandek tasavvur qiling. Sun’iy intellekt bilan ishlashda endi shunday hisoblash hujjati mavjud», — deyiladi xabarda.

Ammo Ironwood — bu shunchaki tezlik emas. Google chipdagi xotira hajmini 192 gibabaytga qadar oshirgan. Bu oldingi avlod tenzor protsessorlardan olti barobarga ko‘p. Shuningdek, chiplar o‘rtasidagi ma’lumotlar almashinuvi ham yaxshilangan. Endilikda u soniyasiga 1,2 terabitni tashkil etmoqda.

Ironwood sun’iy intellekt modellariga murakkab mantiqiy vazifalarni bajarishda yordam beradi. Ular katta hajmdagi ma’lumotlarni tahlil qilib, ularning ichida yashirin va aniqlash qiyin bo‘lgan bog‘liqliklarni topa oladi. Bu fan, tibbiyot, biznes va boshqa sohalarda yangi imkoniyatlarni ochib beradi.

Google Ironwood’ga kirishni bulutli servis orqali taqdim etishni rejalashtirmoqda. Dasturchilar ushbu quvvatdan ilg‘or sun’iy intellekt ilovalarini yaratish uchun foydalanishlari mumkin bo‘ladi. Ikki xil konfiguratsiya taqdim etiladi: kichik vazifalar uchun 256 chipdan iborat klaster va eng murakkab loyihalar uchun 9 216 chipli to‘liq klaster.

Ta’kidlanishicha, Ironwood nafaqat kuchli, balki energiya tejamkor hamdir — u avvalgi avlod chiplar bilan solishtirganda har bir ish unumdorlik birligi uchun ikki barobar kam energiya iste’mol qiladi. Ironwood 2025 yil oxiriga qadar ishga tushirilishi kutilmoqda.