Rossiyalik xokkeychi afsonaviy Ueyn Gretski rekordiga yetib oldi

Aleksandr Ovechkin NHL doirasidagi gollar soni bo‘yicha 1999 yildan beri saqlanib turgan rekordni takrorladi.

Foto: Washington Capitals

Rossiya milliy jamoasi va Amerikaning «Vashington Kepitalz» klubi hujumchisi Aleksandr Ovechkin kanadalik afsonaviy xokkeychi Ueyn Gretski rekordiga yetib oldi.

39 yoshli rossiyalik 5 aprel kuni Milliy xokkey ligasi (NHL) doirasidagi o‘yinda «Chikago Blekxouks» (5:3) darvozasiga ikkita shayba kiritdi.

Bu Ovechkinning 1486 ta o‘yindagi 894-goli bo‘ldi. Natijada u kanadalik Ueyn Gretskining NHL doirasidagi gollar soni bo‘yicha 1999 yilda o‘rnatgan rekordiga (1487 ta o‘yinda 894 gol) yetib oldi. Navbatdagi gol Aleksandrni ushbu rekordning mutlaq sohibiga aylantiradi.

Aleksandr Ovechkin xokkeychilik faoliyatini 2001 yilda Moskvaning «Dinamo» klubida boshlagan. 2005 yildan buyon «Vashington Kepitalz» klubida o‘ynamoqda.

Ueyn Gretski xokkeychilik faoliyatini 1978 yilda «Indianapolis Reyserz» klubida boshlagan. Keyinchalik «Edmonton Oylerz», «Los-Anjyeles Kingz», «Sent-Luis Blyuz» va «Nyu-York Reyndjers» klublarida o‘ynab, 1999 yilda faoliyatini yakunlagan. NHL doirasida ko‘plab shaxsiy rekordlar sohibi hisoblanadi.

#Xokkey #Aleksandr Ovechkin #Ueyn Gretski