Belgiya hukumati «korrupsiya va pul yuvish» jinoyatlari doirasida musodara qilingan 108 mln dollarni O‘zbekistonga qaytarmoqchi

2025 yil 28 mart kuni Bryussel prokuraturasi jinoyat yo‘li bilan olingan mol-mulklarni musodara qilish va boshqarish markaziga (COIV) 108 million dollarni Belgiya davlat budjetiga o‘tkazishni so‘rab murojaat qilgan. Bu mablag‘lar butunlay Belgiya davlatiga foydasiga musodara qilingan bo‘lgan.

Ma’lum bo‘lishicha, korrupsiya, telekommunikatsiya shartnomalari tuzishda noqonuniy komissiya olish va pul yuvish jinoyatlari yuzasidan o‘tkazilgan tergovdan so‘ng, O‘zbekiston adliya organlari Bryussel prokuraturasiga o‘zaro xalqaro huquqiy yordam so‘rab murojaat qilgan.

«BMTning Korrupsiyaga qarshi kurashish bo‘yicha konvensiyasiga asoslangan ushbu rasmiy xalqaro murojaat asosida, O‘zbekiston hukumatining iltimosi bilan Belgiyada jami 200 million dollar musodara qilindi», deyiladi prokuratura bayonotida.

Bryussel sudi Yevropa Ittifoqiga a’zo davlatlar o‘rtasida shu turdagi aktivlarni bo‘lishish to‘g‘risidagi qoidalariga asoslanib, musodara qilingan pul va uning hisoblangan foizlarini Belgiya va O‘zbekiston o‘rtasida taqsimlanishi haqida qaror chiqardi. Unga ko‘ra, sud O‘zbekiston tomoniga 108 million dollar yuborishga qaror qilgan.

Belgiya tomoni rasmiylari ushbu mablag‘lar qaysi jinoyat ishi doirasida hamda kimlardan musodara qilinganiga aniqlik kiritmagan.

Kun.uz O‘zbekiston Adliya vazirligiga ushbu jinoyat ishi va unda musodara qilingan aktivlar yuzasidan so‘rov yubordi.

2022 yilda Adliya vazirligi Gulnora Karimova va u boshchiligidagi uyushgan jinoiy guruhning Belgiya qirolligida ham aktivlar joylashgani, ularni qaytarish maqsadida, O‘zbekiston mutasaddi tashkilotlari hamda Belgiya huquqni muhofaza qiluvchi organlari o‘rtasida hamkorlik yo‘lga qo‘yilganini aytgan edi.

«Belgiyada tergov jarayoni tugamagani sababli (tergov siri), ushbu aktivlar haqida ko‘p ma’lumot oshkor qilish imkoniyati mavjud emas», degandi Adliya vazirligi rasmiysi. Gulnora Karimova va uning jinoiy sheriklari tomonidan noqonuniy orttirilgan va O‘zbekistondan olib chiqilgan aktivlarning umumiy qiymati qariyb 1,3 mlrd dollarini tashkil etadi.

Hozirgi kunda ularni qaytarish bo‘yicha ish olib borilmoqda. Xususan, O‘zbekiston hukumati va Shveytsariya federal kengashi o‘rtasida imzolangan bitimga ko‘ra, Shveytsariya bosh prokuraturasi tomonidan musodara qilingan jami 313 million dollardan ortiq mablag‘lar BMTning ko‘p sheriklik trast jamg‘armasi orqali qaytarilishi boshlangan.