2024-2025 yillar qishi kam yog‘ingarchilik bilan o‘tdi – O‘zgidromet

O‘zgidromet xizmati 2024-2025 yillar qishda qanday ob-havo kuzatilgani bo‘yicha yakuniy tahlillarini e’lon qildi. Unga ko‘ra, O‘zbekiston hududida o‘tgan qish mavsumining harorat tartibi o‘rtacha ko‘p yillik qiymatlarga mos bo‘lgan.

O‘tgan qishning eng sovuq oyi dekabr oyi bo‘lib, harorat me’yordan 1-2,5 darajaga sovuqroq, respublika shimolida va cho‘l hududlarida me’yor atrofida bo‘lgan.

Yanvar esa dekabr oyiga nisbatan iliqroq kelib, o‘rtacha oylik havo harorati o‘rtacha ko‘p yillik qiymatlardan 0,5-1 darajaga, shimolda 2-3 darajaga yuqori bo‘ldi.

Fevral oyining harorat tartibi iqlim me’yoriga yaqin bo‘lib, faqat Farg‘ona vodiysi hududlarida oyning o‘rtacha harorati o‘rtacha ko‘p yillik qiymatlardan 1,5-2 darajaga yuqori bo‘lgan. Shunga qaramay, qish fasllarining isishi bo‘yicha uzoq muddatli tendensiya davom etmoqda.

2024-2025 yillardagi qish mavsumi davomida iliq to‘lqinlar va sovuq to‘lqinlar o‘rni almashgani kuzatilgan. Bunday holat ko‘p takrorlanadi. Respublika hududining katta qismida eng kuchli sovuqlar dekabr oyida, shimolda esa fevral oyida ham kuzatildi. Sovuq eng kuchli bo‘lgan kunlarda havo harorati 8-13 daraja sovuqqacha, Qoraqalpog‘iston Respublikasida va Navoiy viloyatining shimolida 15-18 daraja sovuqqacha, janubda 3-8 daraja sovuqqacha pasaydi.

Qishning iliq kunlarida havo harorati 12-17 daraja iliqqacha, fevral oyi uchinchi o‘n kunligining boshida esa 18-21 daraja iliqqacha, janubda 23-24 daraja iliqqacha ko‘tarilgan.

O‘tgan qishning o‘ziga xos xususiyati – qish faslining 3 oyida ham yog‘ingarchilik taqchilligi kuzatilganida bo‘lgan. O‘zbekistonning katta qismida yog‘ingarchilik miqdori me’yoriy yog‘inning 40-70 foizini tashkil etdi, Farg‘ona vodiysi viloyatlarida me’yordan 40 foiz kam bo‘ldi. Faqat yog‘ingarchilik me’yori juda kam bo‘lgan eng qurg‘oqchil hududlarda mavsumiy yog‘ingarchilik miqdori me’yorga yaqin bo‘ldi.

O‘tgan qish mavsumida yog‘ingarchilik asosan yomg‘ir ko‘rinishida qayd etildi, ayrim kunlarda qorga aylanishi kuzatildi. Qish oylarida yog‘ingarchilik taqchilligi O‘zbekistonning tog‘li hududlarida qor to‘planishiga ta’sir qildi. Qish oxiriga kelib, tog‘lardagi qor qoplami balandligi me’yoriy qiymatning faqat 40-60 foizini tashkil etgan.