Tailandda og‘ir tan jarohati olgan O‘zbekiston fuqarosi vatanga qaytarildi

Bosh konsulxona ko‘magida Tailandda baxtsiz hodisa oqibatida og‘ir tan jarohati olgan O‘zbekiston fuqarosi vatanga qaytarildi.

Qayd etilishicha, 2024 yil 7 dekabr kuni Pattaya shahridagi mehmonxonaning 6-qavatidagi balkondan pastga tushib ketishi oqibatida og‘ir jarohat olgan va kasalxonada davolanayotgan o‘zbekistonlikka konsullik-huquqiy yordami ko‘rsatilgan.

Bosh konsulxona konsuli Chonburi Hospital kasalxonasida bo‘lib ushbu fuqaroning holidan xabar olgan. Shuningdek, tibbiyot muassasasida davolanish vaqtida yuzaga kelgan 352 ming Tailand bati miqdoridagi qarzdorlik ijobiy hal qilingan. Xususan, tibbiy muassasa rahbariyati bilan o‘tkazilgan muzokaralar natijasida umumiy qarzdorlikning 101 ming bati bemor va homiylar tomonidan to‘lab berilgan. Qolgan 251 ming bat (7400 AQSh dollari) miqdoridagi qarzdan kasalxona ma’muriyati voz kechgan.

Shuningdek, O‘zbekiston fuqarosining pasporti yo‘qolgani sababli unga Bosh konsulxona tomonidan vatanga qaytish guvohnomasi rasmiylashtirilgan va Uzbekistan Airways AJning Bangkok—Toshkent yo‘nalishidagi samolyotga aviachipta sotib olib berilgan hamda bemor uchun maxsus joy ajratilgan.