Volgograd oblastida yo‘lovchi poyezd yuk mashina bilan to‘qnashdi

Rossiyaning Volgograd oblastida yuk mashinasi bilan to‘qnashuvdan keyin Qozon — Adler yo‘nalishidagi yo‘lovchi poyezdning sakkizta vagoni izdan chiqib ketdi. Bu haqda Rossiya temiryo‘llari xabar bermoqda.

«Bugun soat 12:35 da Volgograd oblasti hududida Gremyachaya — Kotelnikovo peregonida KAMAZ yuk avtomobili haydovchisi temiryo‘l kesishmasiga chiqib ketdi va yo‘ldan o‘tayotgan Qozon — Adler yo‘nalishidagi 491-sonli poyezd bilan to‘qnashdi. Natijada yo‘lovchi poyezdning sakkizta vagoni izdan chiqib ketishi holati kuzatilgan», deyiladi xabarda.

Qayd etilishicha, haydovchi «signalizatsiya ishlayotganiga qaramay yaqinlashib qolgan poyezd oldiga» chiqib kelgan. Mash manbasi yozishicha, dastlabki ma’lumotlarga ko‘ra, u daraxtlar tufayli poyezdni ko‘rmay qolgan.

TASS regionning sog‘liqni saqlash vazirligiga asoslanib xabar qilishicha, besh kishi «qoniqarli» ahvolda shifoxonaga yotqizilgan. «Interfaks» agentligi favqulodda xizmatlarga tayanib yozishicha, yo‘lovchi poyezdning 100 ga yaqin yo‘lovchisi tibbiy yordamga ehtiyoj sezgan.

Keyinroq Rossiya temiryo‘llari to‘qnashuv oqibatida 150 kishi jarohatlangani, shundan 16 kishi shifoxonaga yotqizilganini ma’lum qildi. Shifoxonaga yotqizilganlardan 13 nafari katta yoshli yo‘lovchilar, bir nafari yosh bola, yana ikki nafari bort kuzatuvchilari. Yana 140 nafarga yaqin kishida yengil tilinish va ko‘karishlar qayd etilgan.

O‘z navbatida, IIV yuk mashinasi haydovchisi shifoxonaga yotqizilganini xabar qilgan.

Mazkur uchastkada poyezdlar harakati to‘xtatilgan. FVV xabariga ko‘ra, avariya oqibatlarini bartaraf etishda 320 dan ortiq kishi va 100 ta texnika ishtirok etmoqda.

Poyezdda jami 800 ga yaqin kishi ketayotgan bo‘lgan.