Украиналиклар ўз ерларини босқинчига совға қилмайди – Зеленский

Украина президенти Володимир Зеленский 9 август куни эрталаб қилган видеомурожаатида Киев Россия билан бўлажак эҳтимолий келишувда ҳудудларни бой бермаслигини айтди.

Бир кун аввал ОАВ Владимир Путин босиб олинган ҳудудларни Россия назоратида қолдиришни талаб қилиши мумкинлиги ҳақида хабар берган эди.

«Украина ҳудудлари масаласига жавоб аллақачон Украина Конституциясида бор. Бундан ҳеч ким чекинмайди ва чекинолмайди ҳам. Украиналиклар ўз ерларини босқинчига совға қилмайди», дейилади Украина президенти мурожаатида.

Зеленский, шунингдек, Украина иштирокисиз эришилган ҳар қандай келишувларни «ўлик қарорлар» деб атади:

«Бизга қарши ҳар қандай қарорлар, Украинасиз ҳар қандай қарорлар - бир вақтнинг ўзида дунёга қарши қарорлардир. Улар ҳеч нарса бермайди. Бу ўлик қарорлар, улар ҳеч қачон ишламайди. Бизга эса одамлар ҳурмат қиладиган ҳақиқий, жонли дунё керак».

Шунингдек, у европалик ҳамкорлар ва АҚШ президенти Доналд Трамп билан ҳамкорликни давом эттиришга тайёрлигини таъкидлади.

Бу Киевнинг Россия ва АҚШ ўртасида муҳокама қилинаётган тинчлик келишуви лойиҳаси можаро томонлари ўртасида ҳудудлар алмашинувини ўз ичига олиши мумкинлиги ҳақидаги хабарларга биринчи реакциясидир.

Бир кун аввал Трамп келишув «ҳар икки томон учун ҳам фойдали бўлган» қандайдир «ҳудудлар алмашинувини» ўз ичига олиши мумкинлигига ишора қилган эди. Путин ва Трамп 15 август куни Аляскада учрашиши керак.