Ростов яқинидаги Тацинская станциясига яна дронлар ҳужум қилди

Бир қатор Telegram-каналлари хабарига кўра, Ростов вилоятидаги Тацинская станциясига дронлар ҳужумидан кейин содир бўлган ёнғин тез орада ўчирилган.

Фото: Telegram / astrapress

Россия Федерациясининг Ростов вилоятидаги Тацинская темирйўл станциясига 6 август, чоршанбага ўтар кечаси яна дронлар томонидан ҳужум қилинди. Бу ҳақда маҳаллий аҳолига таяниб, бир қатор Telegram-каналлари хабар берди.

Shot Telegram-канали ёзишича, «тахминан соат 1:00 ларда Тацинский туманида кучли портлашлар эшитила бошлади, камида 5-7 марта кучли портлашлар эшитилди, бундан олдин тепада учиб ўтган УУАнинг характерли овози эшитилди». «Это Ростов Новости» Telegram-каналига кўра, дрон қулаганидан кейин дарахт ёниб кетган, бироқ тез орада ёнғин ўчирилган. Astra ва Exilenova Telegram-каналлари ҳам бино яқинидаги аланга ичида қолган дарахтни кўриш мумкин бўлган кадрларни эълон қилди.

Ростов вилояти губернатори вазифасини бажарувчи Юрий Слюсарнинг сўзларига кўра, Тацинская станциясида яшовчи уч оила турар жой биноси яқинидаги ёнғинлар туфайли эвакуация қилинган.

Тацинская станциясига қилинган бу ҳужум бир суткада иккинчиси бўлди — аввалгиси 5 августга ўтар кечаси содир бўлди. Украинанинг «Обозреватель» нашри таъкидлашича, бу станция маҳаллий нефт базасига олиб борувчи стратегик муҳим темирйўл линиясида жойлашган.

#Украина #Ростов #Россия #дрон