Украина Россиянинг энг янги атом сувости кемаси ҳужжатларини эълон қилди

Украина Мудофаа вазирлигининг Бош разведка бошқармаси (ГУР) 955А «Борей-А» лойиҳасининг К-555 «Князь Пожарский» стратегик мақсадли энг янги Россия атом сувости кемасига оид ички ҳужжатларни эълон қилди. Ракета ташувчи 2 август куни Мурманск вилоятидаги Гаджиеводаги Шимолий флот сувости кучларининг асосий базасига етиб келди. Сувости кемаси 24 июл куни Россия президенти Владимир Путин иштирокида флот таркибига қабул қилинди.

Эълон қилинган материаллар орасида экипаж учун жанговар йўриқномалар, кеманинг жанговар бошқаруви схемаси, муҳандислик ҳужжатлари, шикастланган радиомаёқни текшириш ҳисоботи, бўлинмани муҳрлаш схемалари, кема жадвали ва ходимларнинг номинал рўйхати, шу жумладан жисмоний тайёргарлик, лавозимлар ва малакаларни баҳолаш бор.

ГУР маълумотларига кўра, бу маълумотлар нафақат «Князь Пожарский» сувости кемасининг хусусиятларини аниқлашга, балки Россия ядровий триадасининг энг муҳим таркибий қисми бўлган бошқа "Борей-А" тоифали ракета ташувчиларнинг техник хусусиятлари ва заиф томонларини ҳам баҳолашга имкон беради. Сувости кемасида "Булава" баллистик ракеталари учун 16 та учириш мосламаси бор, уларнинг ҳар бири бир нечта ядро каллаклари билан жиҳозланиши мумкин.

Ҳужжатлар билан чоп этилган фотосуратларда сувости кемаси структурасининг элементлари, шу жумладан, шубҳали нуқсонлар ёки коррозия белгилари акс этган. Экипажнинг баъзилари учун жисмоний тайёргарлик ҳисоботида паст кўрсаткичлар кўрсатилган, бу маълум участкаларда жанговар тайёргарликнинг етарли эмаслигини кўрсатиши мумкин.