Трамп "оффшор шамол энергетикаси"ни ривожлантириш дастурини тўхтатди

Трамп бир неча бор қайта тикланадиган энергия манбаларини "кўп харажат талаб қиладиган" ва "самарасиз" деб атаган.

Фото: AP

АҚШ президенти Доналд Трамп “оффшор шамол энергетикаси” билан боғлиқ лойиҳалар устида ишлашни тўхтатишни буюрди.

Океан энергетикасини бошқариш бюроси (BOEM) Техас, Луизиана, Мэн, Нью-Йорк, Калифорния, Орегон соҳиллари ва Атлантика океанининг марказий қисмида турбиналар қуриш учун 1,42 миллион гектар ер ажратиш тўғрисидаги қарорни бекор қилди.

Ўтган йили собиқ президент Жо Байден шамол энергетикасини ривожлантириш учун федерал ерларни ижарага бериш бўйича беш йиллик жадвални эълон қилганди. Аммо Трамп ҳокимият тепасига келгач, унинг қарорларини бирин-кетин бекор қила бошлади.

Чоршанба куни АҚШ ички ишлар вазири Дуг Бургум ишончсиз деб топилган шамол ва қуёш электр станциялари учун имтиёзли режим бекор қилинганини эълон қилди.

Трамп Шотландияга ташрифи чоғида шамол турбиналарини "бадбашара махлуқлар" деб атади ҳамда Британия етакчиси Кир Стармерни Шимолий денгизда нефт ва газ қазиб олишни рағбатлантиришга чақирди.

Ундан аввал эса Оқ уй хўжайини Европа комиссияси раиси Урсула фон дер Ляйен билан суҳбати вақтида шамол энергетикасини “иш бермайдиган фирибгарлик” деб атади.

#Доналд Трамп