«Bilol's motors» автосалони раҳбари устидан суд бошланди

Хитойдан электромобил олиб келиб сотиш билан шуғулланган Билол Мамажонов фирибгарликда айбланмоқда. Ундан 48 киши жабрланган. Кўпчилик машина учун 50-70 фоиз миқдорда тўлов қилган. Улардан жами 13 млрд сўм йиғилган. Kun.uz мухбири 24 июл куни ЖИБ Яккасарой туман судида бўлиб, жабрланувчилар билан суҳбатлашди.

{Yii::t(}

Ўтказиб юбориш 6s

Ўтказиб юбориш

Kun.uz ушбу фирма раҳбари қамоққа олингани ҳақида 2025 йилнинг январида ёзган эди. Орадан 6 ой ўтиб, Билол Мамажонов иши судга ўтди. Аммо ишни кўраётган судя Алишер Жалилов судланувчининг қаршилиги сабаб тасвирга олишга рухсат бермади.

24 июл кунги йиғилишда маълум бўлишича, 48 киши «Bilol's motors»га алданиб қолган. Ҳозиргача уларнинг 34 нафари суд терговида кўрсатма берган. Жабрланувчиларнинг сўзларига кўра, «Bilol's motors» бошқа автосалонларга нисбатан арзон нарх таклиф этгани эътиборни тортган. Автосалонда менежер лавозимида ишлаган Камила мижозлар билан шартнома тузган. У келганларга машина ўртача 40-45 кундан 70 кунгача бўлган муддатда топширилишини айтган. У машина нархи нега арзонлиги ҳақидаги саволга буни машиналар тўғридан тўғри Хитойдан келиши билан изоҳлаган.

Кўпчилик машинага тўловнинг 70 фоизини банк орқали тўлаган, нақд кўринишда берганлар ҳам бор. Бироқ шартнома шартлари бажарилмаган. Суд мажлиси тугаганидан кейин жабрланувчилардан айримлари «Bilol's motors»ни қандай топгани-ю, машинага қанча тўлов қилгани ҳақида гапириб беришди.

«Мен ўғлим билан 3-4 йил Россия совуғида қийинчилик кўриб, 4-5 сўм пул топгандик. Кейин Telegram’дан «Bilol's motors» рекламасини кўриб, бунга қизиқиш билдирдик. Телефон қилганимизда, у ерда Камила деган менежери бор экан, шу кўтарди ва бизга шартнома беришини, шартнома бўйича 70 кунда Хитойдан автомобил етказиб берилишини айтди.

Бу 18 ноябр куни эди. Кейин шартномани ташлаб берди. Шартномада автомобил нархи 344 миллион сўм кўрсатилган. Бу BYD Champion эди. Яна телефон қилдим, кредит масаласи қандай бўлишини сўрадим. У Тошкентга келсам, кредит масаласида ҳам ёрдам берилишини, олдиндан 50 фоизини тўлашим, автомобил келганидан кейин қолган 50 фоизини кредит қилишга кўмаклашишларини айтди.

Бошида иккиландим, 10 кун ичида тўламай юрдим. Менга ҳар 2-3 кунда телефон қилиб турди. Охири мени ишонтира бошлади. Ҳеч нарсадан қўрқиш керакмаслиги, фирма 3 йилдан буён ишлаётгани, кўпчиликка машина етказиб берилганини айтди. Мен унинг гапига ишондим ва банк орқали 174 миллион 586 минг сўм ўтказдим. Бу 50 фоиздан озгина кўпроқ эди», дейди шахсини сир тутган жабрланувчи.

Унинг сўзларига кўра, менежер бир неча кун ўтгач, мижозга логин-парол ташлаб беришини, у орқали автомобилнинг келишини текшириб туришини айтган.

«3 кундан кейин логин-парол сўрадим, нега ташламадингиз, дедим. У қандайдир ҳаяжонлангандай бўлди. Ўшанда кўнглим бир нимани сезгандай эди. Кейин логин-паролни ташлаб берди. Орадан яна 10-15 кун ўтди. Декабр ойи эди, автосалонга телефон қилдим, кўтармади. Кейин тўғри Тошкент шаҳар Ички ишлар бош бошқармасига келиб ариза ёзиб бердим. Терговчидан нима бўлганини сўраганимда, пулнинг ҳаммаси Хитойга ўтказиб берилгани маълум бўлганини айтди. Мен ўзим шу тизимда ишлаганман, унинг гапи менга кулгили кўринди. Бу жуда пухта режалаштирилган иш.

На уй-жой, на бола-чақаси, ҳеч нарса йўқ экан. У ҳаммасини олдиндан режалаштириб, хотин-боласи билан ажрашган экан», дейди жабрланувчи.

Ички ишлар тизимида ишлаган ушбу фуқаронинг қўшимча қилишича, жабрланганлар орасида 240-250 млн сўм тўлаганлар бор. Терговчи 48 кишидан 13 млрд сўм йиғилганини айтган.

2024 йилнинг 13 декабрида BYD Song Plus Champion машинасига 238 млн тўлаган фуқаро ҳам бўлиб ўтган ишларни айтиб берди. У ҳам Камила исмли шахс билан машина олди-сотдиси бўйича гаплашган.

«Орадан 2 кун ўтиб (15 декабрда), автосалон раҳбари қамалиб қолганини эшитяпмиз. Бориб текширтирсак, буларнинг ҳисобида пул йўқ экан. Пулимизни қайтариб олмоқчи эдик», дейди у.

Жабрланувчининг таъкидлашича, Билол Мамажонов қамалганидан кейин автосалон кўздан ғойиб бўлган. Камила исмли шахс эса жабрланувчига смс орқали терговчининг рақамини ташлаб берган.

«Энди эшитишимизча, мана шу Билол Хитой пулимни олиб, машина бермади, Хитой мени “ухлатиб юборди” деяпти. Қачон пулимизни берасиз десак, чиққанимдан кейин, дейди. Қачон чиқасиз десак, жавоб йўқ», дейди у.

«Bilol's motors»нинг Telegram-каналида 2024 йилнинг 14 июлига қадар одамларга машина топширилгани акс этган видеолар жойланган. Лекин 48 нафар шахсга на машина берилган, на пули қайтарилган.

Навбатдаги суд йиғилиши 31 июлда бўлиб ўтади. Унда яна 14 нафар судланувчининг кўрсатмалари тингланади.