Усик Дюбуани чуқур нокаутга туширди

19 июл куни «Уэмбли» стадионида кенг кўламли профессионал бокс кечаси ташкил этилди. Турнирнинг асосий воқеаси супероғир вазн тоифасида Александр Усик (24-0, 15 KO) ва Даниэл Дюбуа (22-3, 21 KO) ўртасида мутлақ жаҳон чемпиони унвони учун бирлаштирувчи жанг бўлиб ўтди.

Усик ва Дюбуа ўртасидаги реванш жанги йилнинг энг кўп кутилган тўқнашуви бўлди. Улар илк бор 2023 йил августда рингга чиқишган ва Александр тўққизинчи раундда нокаут билан ғалаба қозонганди. Аммо ўша жанг кейин ҳам узоқ муҳокама қилинган, Дюбуа бешинчи раундда рақибининг бел соҳасига зарба берган эпизод учун ҳакам қарорига шубҳа билдирилган. Рефери украиналик спортчига тикланиш учун вақт берганди, аммо кўплаб экспертлар бу корпус қисмига йўлланган зарба бўлгани ва дарҳол нокдаун ҳолатини қайд этиб, санашни бошлаш керак бўлганини айтишганди.

Шундан кейин Дюбуа ва Усикнинг йўллари вақтинча айро кечишди. Александр ниҳоят Тайсон Фюри билан камарларни бирлаштирувчи жангга чиқиб, ғалаба қозонди, кейин британиялик билан реванш ўтказиб, яна ғолиб бўлди. Даниэл эса Жаррелл Миллер ва Филип Хрговични енгиб, жаҳон чемпиони титули учун яна бир жанг ўтказиш имкониятига эга бўлди. Бундай имконият унда Усик Тайсон билан иккинчи жангни ўтказиш учун ўз ихтиёри билан IBF камаридан воз кечиши туфайли пайдо бўлганди. Бўш қолган титул учун жангда Дюбуа ўзининг ёрқин услубида Энтони Жошуани мағлуб этиб, Британия боксининг янги суперюлдузига айланди.

Албатта, бундай вазиятда Даниэл ва Александр ўртасидаги реванш ўзига хос маъно касб этди. Уларнинг тугалланмаган ўз ҳикоялари бор эди ва ҳар бири унга нуқта қўйишни хоҳларди. Ўртага мутлақ жаҳон чемпиони унвони қўйилганди, бу иккаласига ҳам қўшимча мотивация қўшди. Боксчиларга ваъда қилинган ҳаддан ташқари юқори гонорарлар ҳам: икки киши учун деярли 200 миллион доллар белгиланганди, шундан 132 миллион доллар Усик учун эди. Бу ҳар томонлама том маънода катта ва юлдузли жанг бўлиб, ҳар бир боксчи ғалаба қозонишга жуда иштиёқманд эди.

Дюбуа кутилганидек илк дақиқалардан прессинг уюштирди, Усик кўп ҳаракатланди ва британияликни жеб зарбалари билан қарши олди. Даниэл рақибнинг корпус қисмига ишлаб, ёндан зарбалар сериясини амалга оширишга эътибор қаратди, Александр ҳам буни жавобсиз қолдирмади — боксчилар жангнинг старт қисмида юқори старт намойиш этишди.

Дюбуа ҳудудий устунликка эга бўлди, унинг зарбалари зичроқ эди, аммо Усик ҳар сафар олдинга ташланаётган британияликни хатоларда моҳирона тутиб олди ва самарали ҳаракат қилди. Шу билан бирга, Даниэл ўз линиясини давом эттириб, украиналикни бурчакка тақашга ҳаракат қилди ва вақти-вақти билан бунга эришди ҳам.

Аммо бешинчи раундда жанг кутилмаганда якунланиб қолди. Рақиблар бор кучни ишга солиб, жон-жаҳди билан ҳаракат қилишга киришди ва зарбалар алмашинуви вақтида Усик ўнгдан кучли зарба йўллади — Дюбуа полга қулади. Даниэл жангни давом эттирди, аммо негадир яна яқин масофада туриб, зарбалар алмашинувидан қочмади, Александр уни энди чап қўл ён зарбаси билан қарши олди ва капасини ҳам учириб юборди: бу сафарги зарба анча жиддийроқ эди ва Дюбуа рефери санашни тугатгунча ўрнидан кўтарила олмади.

Александр Усик IBF титулини ўзига қайтарди ва яна супероғир вазн тоифасида мутлақ жаҳон чемпионига айланди.