Netflix харажатларни камайтириш учун биринчи марта сунъий интеллектдан фойдаланди

Netflix ўзининг оригинал телекўрсатувларидан бирида генератив сунъий интеллект яратган визуал эффектлардан биринчи марта фойдаланганини эълон қилди. Бу эса компанияга бюджетни тежашга ёрдам берган, СИ махсус эффектга қараганда 10 баравар тезроқ ушбу саҳнани ясаб берган. Бироқ бошқа киностудия асосчилари буни “ҳунарни оёқости қилиш” деб баҳоламоқда.

Компаниянинг бош ижрочи ва асосий контент директори Тед Сарандоснинг сўзларига кўра, кўрсатмалар асосида видео ва тасвирлар ишлаб чиқарадиган сунъий интеллектдан Аргентинанинг “Этернаутлар” илмий-фантастик шоусида бинонинг қулаши саҳнасини яратиш учун фойдаланилган.

Унинг сўзларига кўра, айнан сунъий интеллект ишлаб чиқариш гуруҳига кетма-кетликни тезроқ ва арзонроқ нархда бажаришга имкон берди.

Бироқ генератив сунъий интеллектдан фойдаланиш кўнгилочар индустрияда баҳсли мавзу. Чунки бошқаларнинг ишларидан уларнинг розилигисиз фойдаланиш муаммоси – яъни муаллифлик ҳуқуқини инобатга олиш керак бўлади.  

Директор Сарандос бу борада Netflix даромадлари ҳақида қилган чиқишида гапириб ўтган. Маълум бўлишича, компания  июн ойининг охиригача бўлган даврда ўтган йилгига қараганда 16 фоиз кўп даромад қилган. Шу даврда фойда 2,1 млрд доллардан 3,1 млрд долларга ошган.

Netflix’нинг қўшимча қилишича, кутилганидан яхшироқ фойда олинишига Жанубий Кореянинг “Squid Game” (“Калмарлар ўйини”) триллерининг учинчи ва якуний серияси муваффақияти сабаб бўлган, бу эса ҳозиргача 122 миллион томошани жалб қилган.

Директорнинг таъкидлашича, “Тhe Eternauts” филмида қўлланадиган Буэнос-Айресдаги бинонинг қулашини кўрсатувчи кетма-кетликни сунъий интеллект махсус эффектларга қараганда 10 баравар тезроқ битказиб берган.

“Махсус эффектнинг нархи бу бюджетдаги шоу учун имконсиз бўлар эди. Бу Netflix’нинг оригинал сериали ёки филмини суратга олишда ишлатилган биринчи сунъий интеллект маҳсулоти бўлди. Шундай қилиб, ижодкорлар натижадан ҳайратда қолишди”, деди Тед Сарандос.

Сунъий интеллект 2023 йилда Голливуддаги иш ташлаш пайтида кўтарилган асосий ташвишлардан бири эди. Америка телевидение ва радио санъаткорлари уюшмаси СИдан фойдаланишни қаттиқроқ тартибга солишга чақирди. Саноатдаги баъзилар кинода сунъий интеллектдан фойдаланишни танқид қилиб, уни “ҳунарни камситувчи” деб атади.

2024 йилда киномагнат Тайлер Перри СИ томонидан яратилган видеоларнинг тез ривожланиши иш жойларига таъсир қилишидан қўрқиб, Атлантадаги студиясини 800 миллион долларга кенгайтириш режаларини тўхтатди.

Ўша пайтда OpenAI’нинг Сора каби сунъий интеллект воситалари эълон қилинган эди, бу оддий матнли кўрсатмалардан яратилиши мумкин бўлган кадрлар сифатини ҳайратда қолдирди, шунингдек, иш хавфсизлиги билан боғлиқ хавотирларни келтириб чиқарди.

Сингапурдаги “CraveFX” анимация студияси асосчиси Давиер Юннинг таъкидлашича, Netflix’нинг генератив сунъий интеллектни қабул қилиши ажабланарли бўлмаган, чунки кўпроқ йирик студиялар технологияни олқишламоқда.

Генератив СИ визуал эффектли рассомлар ғояларни ҳаётга татбиқ этиш учун танлаши мумкин бўлган рақамли воситалар рўйхатига қўшилади, дейди у.

“Бу вақт масаласи. Сунъий интеллект, албатта, кичикроқ студияларга катта бюджетли кўринишдаги визуалларга эришиш учун эшикларни очади”, дейди сингапурлик киночи.

Шоҳрух Мажидзода тайёрлади.