«Руслар қандайдир тарихчи билан келди». НАТО бош котиби Истанбулдаги Россия делегацияси таркибини танқид қилди

НАТО бош котиби Марк Рютте Россия президенти Владимир Путин Истанбулдаги Украина билан тинчлик музокараларига «жиддий одамларни» юбормаган деб ҳисоблайди. Бу ҳақда у АҚШ президенти Доналд Трамп билан Оқ уйда ўтказилган қўшма матбуот анжуманида маълум қилди.

«Сиз [Доналд Трамп] Марко Рубио ва Стив Уиткофф билан биргаликда Истанбулдаги ушбу музокараларни бошлаганингизни эслайман. Ўзим ҳам май ойида НАТО ишлари бўйича Туркияда бўлдим ва биз Истанбулга жиддий делегация юборишлари учун укрианаликларга ростдан ҳам босим ўтказдик. Ва улар буни амалга оширди. Аммо кейин руслар Россиянинг 1250 йилдан бошлаб тарихини тушунтиришга киришган қандайдир тарихчи билан келди», — деди Рютте.

Афтинда, у Россия делегацияси бошлиғи, РФ президентининг ёрдамчиси Владимир Мединскийни назарда тутган — у тарих фанлари бўйича докторлик даражасига эга.

Россия ТИВ расмий вакили Мария Захарова Рюттенинг баёнотини «абракадабра» деб атаб, «масаланинг тарихини билмасдан туриб, бирор муаммони ечиб бўлмаслиги, фақат чуқурлашиши мумкинлиги»ни маълум қилди.

Рютте олдин ҳам тинчлик музокараларини олиб боришга масъул Россия делегацияси раҳбарини танқид қилганди. Июнда у уруш тугаши учун музокараларга «Истанбулда икки марта пайдо бўлиб, Россия ва Украинанинг XII асрдан бошлаб тарихини айтиб берган тарихчи эмас, Путин кераклигини» айтганди. Мединский бунга жавобан Рютте «XII асрда Украина бўлмагани»ни билиб олиши учун унга дарслик юборишни таклиф қилган.

Владимир Мединский 2022 йилда ҳам Истанбулдаги тинчлик музокараларида Россия делегациясига раҳбарлик қилганди. Жорий йилда эса Россия ва Украина Туркия пойтахтида икки марта музокара ўтказди — 16 май ва 2 июн кунлари. Унда томонлар ўт очишни тўхтатиш шартлари ҳақида таклифлар алмашди, шунингдек, ҳарбий асирлар ва ҳалок бўлганлар аскарлар жасадларини алмашишга келишиб олди. Музокараларнинг биринчи раундида Мединский Россия «абадий урушишга» тайёрлигини маълум қилган.